Addat Magsahawi

Mahumu natu' pagkadungugan ha kamaasan natu' magpamung, "bang kamu yan di' na sagdahun/ungsitun/sahawihun/ tanda' sin kulang na in lasa kaniyu sin maas niyu". Bima'na bang in maas malasa ha anak niya daran niya siyasagda atawa sahawihun ha supaya in anak niya muntul iban imingat maghinang sin unu unu na hinang. Bihadtu ra isab in pamung sin kaguruhan magpasampay agama, awn daing kanila magpamung, hangkan kami, laung nila, miyari kaniyu magpasampay tanda' sin lasa namu' kaniyu. Ha kahawpuan niya in magsahawi siyahawihi nakalamud siya daing ha tiranan sin hinang marayaw. Laung sin manga sila isab tagapanghati in pagsahawi atas duwa parakala': hikaisa, Pagsahawi amun makabangun (constructive), iban pagsahawi amun makalarak (destructive). Asal matampal na katu' taniyu in jinis pagsahawi amun makalarak. In katan sahawi amun mangdahi pa hikakangi', hikapalukkanat in yan subay natu' tuud layuan.

In pagsahawi nahinang na inasil sin manusiya'. Daing ha sabab sin inasil na siya kalagihan in subay siya hibutang ha tampat amun matup kaniya iban amun tampat mabassa sin katan. In blag ini hinang ha supaya hikaluun in manga sahawi sin bangsa Sug (sakup in Samal, Buranun, Yakan,Jama Mapun, Kalibugan, Bangingi' iban sin kaibanan pa) amun daing ha angay ini yaun hadja nagliligut ligut ha laum sin utuk nila.

Bukun kitaniyu awam ha kahalan sin bangsa natu', mataud tuud in amun kalagihan sahawihun ampa pagisun-isunan bang biyadiin in pagpasampay sin manga sahawi natu' pa manga kanakuraan, pa manga kaguruhan, pa manga magjijimpulag, pa manga magiiskul, pa manga maguusaha, pa manga magpasampay agama. Bukun in maksud magbutang kitaniyu sin manga sahawi natu' di bat in kitaniyu maingat na atawa amuna in subay dungugun, adapun in manga ini hinangun ta hadja dan bang biyadiin in hikatipun ta sin manga pikilan amun hikatabang ha unu unu na kahalan kalalagihan ha susungun.

In sahawi niyu amun makabangun taymaun hadja sin kami. Adapun in mapuas daing hadtu hi tawu' namu' na hadja.

Magsukul

KaputBlag