Daran kami magpakarungug kabtangan ha manga sila naggulal makahati, ha tungud paghambuuk. Sumagawa' kakitaan baha' duun ha naghimumungan in paghambuuk yan?
Bang manggayunggung ha lubid sin agama in pag hambuuk, na' subay ingatun in lubid. Bukun ka in lubid gumun di' masugpat? Bang mabaya' manugpati sin pagkasilasa sin kauman iban jamaa subay in tumpukan sin manunugpat yan bukun gumun. Bukan ka?
Kibita-kibita in pais yan!
In agama sahawi bukun pagtaas-tiyaasi wahay kamu kaguruhan namu’. In sahaya sin kauman amun manga sila halul akkal makahambuuk sin napupulak-kanat bukun makapalukkanat sin hangka lubiran. Daying ha sabab yadtu bilang hambuuk ipun sin Tuhan bukun banyaga' sin nangangaku bar-akkal, andu' hak sin kami kumibit pais hasupaya sama-sama makananam. Lubira niyu naa in nabubugtu' ha laum bilik ha di' pa kamu makapasugpat sin ha pantan.
In Qur'an maha mulliya hambuuk da, in Nabi Muhammad hambuuk da, in kiblat hambuuk da, in kiyabubutangan ta dunya hambuuk da, na' mayta' subay magpataud sin dahan? Piyagbin in madzhab sin manga sila halul akkal ha sara' sin agama hasupaya lumuhay in pagibadat sin huling jaman, bukun ka? Sumagawa', mayta' sampay nahinang hikabinsana' sin maglahasiya, iban hikapagbuak sin magkasi lasa?
Dumulan natu' balik in Qur'an. Bukun hat bassahun, sumagawa' nanamun, patungun iban pangannalun bat kita di' magumun.
Bukun kita in tagbaktulan sin Islam, daying ha sabab yadtu dihilan ta dan in kaibanan humati kaniya. Bukun katu' hadja in imamu, karna' tuput Tuhan da in makahati sin agama Niya. Bukun in agama manahut biya' sin tabiya' nahut sin utuk sin manusiya'. Daying ha sabab yadtu limaya in hisiyu-siyuna mabaya' magpaluag sin pamaham niya. Bukun in Qur'an iban Hadith kural, daying ha sabab yadtu ayaw ta pa'gangan in tau mabaya lumurup kaniya.
Kibit kibit pais tuan guru, hablunun ta magbalik in lubid? Atawa uturun ta sin utud uway.
0 comments: