Magsaggaw Hangin

Hambuuk adlaw nahilu hala’ in tau ha Baghdad sin pagsaggaw hangin. Agad katilibut sin lawm paghula in bahana, simaplag. Naginumpung in tau ha pantay maluag gawi kimita’ sin pagsaggaw hangin  piyaawn sin Sultan. Duun na natipun in indajinis laggu’ manusiya’ nagkumpul sin kakahuy-kahuyan hinang kural. Sakaula-ula saggawun nila in hangin sin kural kahuy yadtu. Hangkarai’ paman dimatung na ulimpus. Unupakaw na biya’ sin diyudla’ in manusiya limapud dimagan sambil in manga kahuy hinang kural nabulakay ha kusug sin ulimpus. In baynat niya, nasusa in Sultan karna’ wayruun naagad in kabayaan niya kimita’ magsaggaw hangin.

Paguwi sin Sultan pa astana’, piyatawag niya hi Abunnawas.  Hangkaraih paman dimatung na hi Abunnawas pa astana. Namung na in Sultan sin maksud niya. 

Sultan:

Abunnawas magkahagad kaw sin masaggaw in hangin?

Abunnawas: 

Huun, Ampun, magkahagad.

Sultan:

Biyadiin kaagi? 

Abunnawas: 

Maluhay rayan ampun dihili hadja aku 9 adlaw saggawun ku in hangin.

Sultan:

Maraw na.

In Sultan hantang nainu inu kan Abunnawas ampa namung ha manga tindug niya bang bunnal masaggaw hi Abunnawas in hangin.

Tindug:

Ayaw nakaw ampun masusa, tagaran ta siya sampay pa janji’ bang di’ makaguwa’ dihilan ta siya hukuman.

In nahinang sin Sultan iban tindug niya timagad ha janji’ hi Abunnawas. Pagdatung hi Abunnawas pa bay nanali’ tali’ siya sin janji niya ha Sultan. In hinang niya simakat pa atup sin bay ampa namikilan. Nagdum nagadlaw hi Abunnawas ha taas atup wayruun na pagkaun. Unu pakaw hi Abunnawas nanglammahan na sin hapdi’. Pagabut man ha mahinaat sin hikasiyam adlaw, kimawa’ na siya kassa’ sibi’-sibi’ iban tutup niya ampa siya miyadtu pa astana’ sin Sultan.

Pagdatung niya pa astana’ magtuy nagbalukahad katan daing ha tindugan in manga karatuan iban na sin Sultan. Simalam na hi Abunnawas ampa imiyan:

Abunawas: Ha di’ kupa hikatukbal kaniyu in janji’ ku, subay kamu jumanji’ di’ dugalan iban di’ niyu aku unu unuhun. 

Timangu’ in Sultan iban sin karatuan ha supaya hadja kakitaan nila in hangin masaggaw. Unupakaw hi Abunnawas nagpasaula-ula na simung pa unahan ampa niya giyuwa’ in kassa’ daing ha bulsa. 

Abunnawas:  janji’ ku kaniyu in hangin nasaggaw kuna. Amuhadja in hangin ini di’ niyu kakitaan sumagawa’ kaingatan niyu siya hapanghamut. 

Laung sin Sultan, bang bihadtu ra subay natu’ hamutun. 

Way katukin tukin simung pa unahan in Sultan iban sin karatuan ampa piyasuuk hi Abunnawas in kassa’ pa lungag ilung nila. Iyukab magtuy hi Abunnawas in tutup sin kassa’ ampa nagdura’ niya piyahamut in Sultan iban Karatuan. Way miyabut pila saat way nakapamung in Sultan iban karatuan magtuy piyunung sin bahu’ sin utut hi Abunnawas.  

Piyunung man katan gimuwa’ na ha astana’ hi Abunnawas ampa siya timudju’ pa bay niya. Wayna kayba’ niya karna’ sin kiyatunay niya na in janji’ niya ha Sultan.