Hi Abunnawas naghihinang bilang tau kapangandulan hi Sultan Ali Ibnu Bakri. Hi Abunnawas tanug bilang tau mapanday iban ahli magpapalla amun tanug. Hambuuk adlaw in Sultan nakananam katahayan pikilan paghuwas naghinang malugay naghidjatul sin raayat. Hambuuk dum diyaak sin Sultan hi Abunnawas miki kissa sin manga kissa amun bidda’-bidda’ iban makaajaib, amun kasusuban sin Sultan, hipagpaig sin katahayan sin pikilan niya.
Ha kabiyaksahan, in Sultan magdungug kissa hi Abunnawas ha di’ pa siya matug dum. Jimawab hi Abunnawas, “Iban kagaan sin atay, wahai Sultan marayaw iban masanyang…”
Nagkissa na:
Wahai Sultan masanyang, awn hambuuk daraakun ha astana’ namung pa Sultan sin sina’:
Wahai Sultan sin Jaman ini, in tau bay nagparinta ha manga daraakun niya kumawa’ tubig iban sin katan kalalagihan hipaghugas lima sin hambuuk bisita niya amun bidda’-bidda’ iban makainu-inu. Dimatung man in kapanyapan nanghugas na in bisita yadtu sin tubig iban sabun, asin, iban dahun naka 120 biyalikan.
Paghuwas yadtu ampa siya kimaun “Ragut” (jinis kakaun in awal niya daing ha Baghdad) sagawa’ in bata’ yadtu kimaun sakaula ula malu’duk iban siyusumu, samantara’ isab in kami iyaatud namu’ siya sin atud hipu’ paginu-inu, sabab in lima iban katan anggawta baran niya namimidpid.
Pagkita’ namu sin lima niya, ampa namu’ kiyaingatan in bakul lima niya nautud, in piyagsungit niya tuput da upat gulamay, sahingga nahinang sabab in pagkaun magkahulug daing ha lima niya. Iyasubu namu’ siya iban paginu-inu, “Unu in jimatu ha bakul lima mu? Unu piyapanjari kaw sin Tuhan bihaini na in kahalan, atawa bakas kaw nagaksidinti?”
Simambung in bata yadtu, “sapahan ku ha ngan sin Tuhan, bukun hadja bakul lima ku nalawa’ sagawa’ sambil pa hansipak bakul lima ku iban duwa tikud-tikud ku, biya’ sin amun kita niyu bihaun.
Ampa niya piyakita in duwa lima iban karuwa siki niya. Kita’ namu’ in lima niya lawa biya’ da sin tuu niya iban in duwa siki niya wayruun tikud-tikud. Hapagatud namu’ in paginu-inu namu’ magduruhun, sambil kami namung kaniya, “Di’ na kami makasabar tumagad sin kissah mu iban sin sabab kautud sin duwa bakul iban sin tikud-tikud mu iban mayta’ kaw maghugas sin lima mu maka 120 balikan.”
Namung in bata yadtu, “In ama’ ku hambuuk daing ha manga maguusaha tanug ha Baghdad ha waktu pamarinta hi Khalifa Harun Al-Rashid. Sagawa’ in ama’ ku masuwak maginum anggul iban magpanayam miyusik, sahingga ha waktu pagpatay niya wayruun kiyabin kakuh unu unu.
Naghinang na aku sin pagparakala’ kamatay kaniya, nagpaawn pagbassa Qur’an, iban nagmasusa sin kataykud niya ha masa landu’ malugay. Paghuwas yadtu ampa ku iyukab in kadday kiyabin hi ama’ iban ha kita’ ku in kiyabin niya tiyu’-tiyu’ da alta’ pagubus mataud utang. Daing ha sabab yadtu nalugus aku nagbayad inut-inut sin katan utang niya.
Ampa aku timagna’ nagdagang sambil namayad sin utang hi ama’ tiyap-tiyap hangka pitu. Sambil ha hinapusan niya kiyabayaran ku katan in utang salta’ in muddal ku magsusung da isab in taud. Hambuuk adlaw, sa’bu ku naglilingkud ha kadday ku, awn dimatung pa tabu’ hambuuk babai malingkat, amun in lingkat niya wayruun ku bakas kita’, in pamakay mahalga’ iban iyaari arihan palmata.
In siyakatan niya hambuuk kaldai umagak, iban hambuuk iypun niya usug maitum miyamanaw ha unahan iban in hambuuk miyumurul ha ulihan. Nimaug na in babai yadtu daing ha taas kaldai niya ampa simud pa tabu’. Ampa siya timikang sin siki niya pa tabu’ in hambuuk jaga miyadtu kaniya sambil namung, “ Tuan putli’, sud nakaw, sagawa’ ayaw sambil awn tau makakila kaymu, sabab makabaak kita kasusahan.
In magjajaga duun da way mimig nagjajaga ha babai, sambil nangatud-ngatud kadday. Daing ha sabab luwal da kadday ku in ukab, in babai yadtu timudju pa kadday ku. Imasip na siya kaku’ ampa limingkud…
Masuuk man in subuh, hi Abunnawas wayna kayba’ ampa namung in Sultan, “in suy suy mu yan makainu-inu iban malingkat!” Jimawab hi Abunnawas, “kunsum dum in suy suy labi makaibug iban malingkat dain sin dum yan.”
0 comments: