In manga sahawi liyuun sin kami magtup iban sin kahalan jimajatu ha bangsa Tausug bihaun ha katilingkal dunya. Ha kiraniya in ikaw hambuuk nakura' nagtataumaas ha laum kawman, naguuhan sin pagnakura' ha Sug atawa nagparagan sin hambuuk tumpukan hawnu hawnu na, kari kamu bassa adakala awn manga sahawi sin raayat niyu amun labi makadihil dayaw ha pagparagan niyu sin pamarinta. Damikkiyan in manga kaUlamaan iban kaguruhan bangsa Tausug subay ra isab sila di malipas mamassa massa sin manga pikit pikilan ha laum ini. Adakala awn manga daing ha bangsa nila magkalagihan tatabangan nila labi awla ha hal pagparayaw sin pagagama. Bihadtu ra isab in maguusaha subay ra nila dihilan waktu simib mamassa sin manga sahawi palahilan pagusaha. Adakala dain ha tandawan ini kakitaan nila in manga hikasung iban hikaganap kusug sin pagusaha nila.
Lamud na sambil pa manga panubu' sin Kasultanan iban sin manga kadatuan amin nagpipikil iban himihinang sin dan hikapalimaya nila sin hula' kalasahan. Ayaw kamu magduwa ruwa magpasampay sin sahawi iban kabayaan niyu hinangun ha raayat sin Sulu. In blag ini tuput hadja sahawi in hiluun, sibu da in sila kiyasisigpitan iban sin wala'. Sakup in tibayhuan kabuhi' sin bangsa Tausug, puas hadja in pagkatau sin hambuuk manusiya', sahawihun ha supaya in kapatut hapagsuwara maparagbus. Hangkan na liyamud namu' sahawihun sambil magiiskul, iban magiinternet Tausug karna' in sila natarbilang hiyahalgaan namu'.
Ha hawpu' bissara misan kami maghablak sin sahawi di ha blag ini, dirihilan namu' da isab had ha supaya maawn in pagsulut-sulut ha antara sin nagsahawi iban sin sahawihun.
Ha manga sila di makatawakkal umusal sin ngan nila bunnal makajari ra umusal danglay hadja. In katan sin sahawi hipikit namu' di manunjuki pa maksud karayawan.
Magsukul ha panauri niyu.
Kaputblag
0 comments: