Paghambuuk ha ngan sin maksud

In dunya sin Tausug najugjug tuud sin jugjug amad. Puas ha hinang sin manga satru' pa bangsa iban hula', mataud tuud parsaggaan ha unu unu tibayhuan kabuhi' sin Tausug. Di ha sulat ini mabaya' hadja hisuwara in manga maniyu tiyu kiyasakupan jimatu ha katan bangsa Tausug amun nagpipikil sin pagpalanyut sin bangsa, hula' iban agama.

Tagnaan ta daing ha pagjimpulag sin MNLF.

In MNLF ha kiyahatihan sin kami kaanakan landu' in kusug ha waktu tagna' kapaawn kaniya adapun limabay man in masa timagna' gimuya' sabab sin naawn in pamutasi sin kaibanan ahli, sambil dimagbus na in pagnganan MILF.

Di ha panagnaan sanga ini, in kita' sin manga namutasi in MNLF kunu' in pagjimpulag bukun ha ngan sin Islam, atawa bukun kunu' "Islamic".

Limugay lugay man in MNLF, awn na isab gimuwa' hambuuk tumpukan amuna in pagtagun Abu Sayyaf. Hangkan subay kunu' magpaawn Abu Sayyaf pasalan in pagjimpulag sin MNLF bukun kunu' bunnal Jihad. sabab in Jihad kunu' iban revolution di' magsibu' in maana. Kalu isab bunnal sabab in manga nagkalimun lawa' yadtu (yadtu na sila ha laum karayawan nila) pantuk ha bahasa arab. Adapun puas daing ha sabab ana' ana' yan awn pa dugaing sabab amun di' hikapagamu sin MNLF iban Abu Sayyaf. Misan bihadtu naawn na in pagparrak.

Limugay lugay man awn na isab gimuwa' hambuuk tumpukan amun piyaguhanan mismu sin manga mataas upisyal sin MNLF, in piyag maksud tumpukan di amuna in ICC. In maksud magkulang maglabi sin manga nakura' ini ha panghati sin kami magpabuntul ha manga wala' imamu papanaw sin MNLF (bang in maksud sabunnal kiyahatihan niyu, sagda man kamu).

Naawn man in pagsulut sin MNLF iban parinta Pilipinas in MNLF naganad-anad na nagpaguwa' sin dagbus sin pamarinta niya ha babaan sin pamarinta Kuffar. Ha kahawpuan niya, naawn da in kalingugan pasalan sin manga sabab manyabab amun landu' in haba' bang hitaki taki ta di ha blog ini. Di na ha masa ini, naawn na isab MNLF council of 15 iban maksud gumanti' magparagan sin MNLF, pasalan in hi Nur Misuari kiyarasuk na pa laum kuddam basi'?

Ha hinapusan niya nakaguwa' man in maas daing ha laum kuddam basi', nabuhi' na isab in manga kanakuraan sin MNLF amun wayna kiyaamuhan ha paragan hi Misuari. In manga kanakuraan nasabbut ini amun manga sila mabaya' hipagpatuy in maksud sin MNLF biya sin kaina tagna'. In ngan sin tumpukan ini amuna in United Moro Overseas Association (UMOA). In panawag tawag sin tumpukan ini maghambuuk ha ngan sin maksud sumagawa' bukun na ha paguhanan hi Misuari.

Manjari in sumunud kahalan amuna in kahalan sin manga panubu' sin Kasultanan.

Ha bihadtu na in taud sin gumuwa' panubu' sin Kasultanan gimuwa' naggulal Sultan wayruun pa misan hambuuk dimagbus in kabayaan nila pa bangsa, hula nila. Sibu' da daing ha panubu' sin Kiram, pa Pulalun, Shakirullah, Aranan iban sin kaibanan pa amun yan naghihidjatul sin pagangkat Sultan.

Bang dungugun pa hansipak pa hansipak nagdara katan salsilah iban kapatut salta' iban da isab raayat timataud kanila. Amu hadja ha bihaini na taud nila wayruun jimatu kanila in bunnal pagtibuuk. Laung sin daing ha hansipak in sila yaun bihaini, laung isab sin ha hansipak in sila yaun bihaini. Sambil in kaawnan maawn na in parsaggaan ha antara' nila.

Ba'gu ba'gu ini di na kasaypuwahan in basag sin prugram piyaawn sin UTC amun manawag tawag ha katan magbalik pa bangsa pulna amuna in Tausug. Sambil in kaawnan kita' sin bangsa Tausug ha katilingkal dunya biyadiin in dan hipagkawa' magbalik sin hula' bukun labay hapagbunu'. Di ha hal ini nagpakita' suntu' in UTC/P pa katan bangsa Sug lamud na in panubu' sin Kasultanan sin paghambuuk, amun kiyatagnaan nila sin November 17, 2009 yaun. Misan in kaibanan liyuran sin kasultanan way timaud, awn da isab pagtibuuk ha antara sin council of Royal Datus ha piyaguhanan hi Datu Albi Julkarnain iban sin United Tausug Citizens. In baynat sin pagtayakkup ini nakapaawn sila hambuuk ngan biya' na sin United Tausug People. In angan angan sin tumpukan ini ha bulan March, May iban September hi Tilahak in Independence pa katilingkal dunya.

Amura kuman in makasusa ha bihaini na in pagtuyu' sin puntukan nakura' biya' na kan Sultan Bantilan Muizuddin II bin Datu Wasik Aranan nagbawgbug sin bangsa ha babaan sin United Tausug Citizens masi masi pa mataud panubu' sin kasultanan in way timaud. Gamman maggaganap pa in gumuwa' tumpukan daing ha panubu' sin kasultanan magparuli sin hak nila.

Pangasubu iban Sahawi:

Unu baha' in mahalga' hapagjimpulag "Pamikil", "Papanaw" atawa "Maksud (hula', Bangsa, Agama)"?

Bang in jawab pamikil iban papanaw asal in guwa' biya' hadja sin kiyasakupan natu' pulakkanat iban jagjag.

Unu baha' in mahalga ha manga panubu' sin Kasultanan, "liyuran", "Papanaw" atawa "Maksud"

Bang in jawab liyuran iban papanaw in guwa' niya biya da sin bihaun, pulakkanat.

Unu baha' in mahalga' gumuwa' hadja in hambuuk liyuran magpaguwa' sin kasabunnalan atawa subay ra pagtayakkupan sin katan panubu' sin kasultanan? 

Bang in kaawnan hambuuk hadja liyuran in magpaguwa sin yaun samata mata in kaibanan tantu in guwa' niya,biya' da sin bihaun pulakkanat.

Unu baha' wayruun na dan sin katan magjijimpulag daing naman ha manga Moros sambil pa katurunan sin Kasultanan magtayakkup?

Awn hadja dan sumagawa' subay in paunahun maksud iban ihlas maglingkud sama-sama salta' tauran sin manga ka ulamaan iban sin raayat. (Ha hal ini yan in UTC/P nanawagtawag, bima'na in kalagihan da kuman sin kaibanan magpalanu' sin niyat magtibuuk ha ngan sin kasabunnalan). Asal da in UTC/P bukun da isab subay kanila in maagad (way pagtabang dapit).

Atawa bang awn dan labi in dayaw daing ha hihinang sin UTC/P bihaun subay awn mamikilan bangman matibuuk in bangsa Sug amun nagpipikil sin Hula', Bangsa, Agama.

Ha pangatud sin kami bulak in pamikil. ampa na in Tausug magpataud sin tumpukan ampa na mahunit madawhat in daraugan. Sumagawa' in kalagihan mi' na kitaniyu bihaun tumpukan amun mapatut pagtibuukan sin katan, salta' pagtaayunan sin katan. Bang manga ibarat dagangan timbangun natu' na bang hawnu in amun subay tauran sin katan ha supaya in kahalan di' na hadja magbalik-balik.

Duun naka in pamarinta Sultanate, Democracy, Caliphate, Communism, Socialism atawa unu unu na bangman kapagtibuukan sin katan. In daraugan mahunit tanggungun sin hambuuk tumpukan hadja. Sumagawa' bang yan nagtibuuk katan awn hadja datungan labi marayaw daing sin kiyasakupan natu' bihaun.

In luun bayta' ini bukun maksud hipangatak pa hisiyu siyu na pihak. hisuwara namu' hadja in sahawi ini adakala misan dakuman hangtunga' pikilan awn hikaganap pa manga panali' sin manga magtatali'.