Bang in Bigi Gumamut na

Bismillahirrahmanirrahim.

Laung Niya: "Sagawa' in kamatauran sin manusiya' di' makaingat. Amura in kaingatan nila in manga nahinang palihalan sin dunya, adapun in sila kulang in paruli ha dunya magdaratung" (Qur'an 30:6-7)

In jaman natu' ini hipu' sin makamumula, iban makaliligap ha laum niya. Daing naman ha guwa' sambil pa laum bay madtu mari in mangambit madtu pa hinang amun hikaig sin lipaga ta daing ha kumannal pa Nagpapanjari iban dumungdung ha maksud sin kabuhi' ta ha dunya. Bunnal tuud in manusiya' ini ha laum hadja sin kaligap iban imaapas madtu mari sin angan, mapuas daing ha manga sila amun piyapanduan sin Allah SWT.

In kabuhi' sin manusiya' amuna in sarayaw-rayaw iban salingkat-lingkat daing ha katan piyapanjari. Adapun in kalingkat iban karayaw niya wala nakabutang ha dayaw bustan atawa ha dayaw lupa sin pamaranan lahil. Adapun in piyagbahasa lingkat iban dayaw hadil sila ha laum. Sambat da sin bahasa sin maglalawag tunang-tunang "Beauty is useless but character is the best". 

In duwa parakala' yan lumahil ha pagkatau sin hambuuk manusiya' apabila in bigi sin iman gumamut na ha laum sin ginhawa. In ginhawa sin manusiya' biya' saparati hambuuk puun kahuy amun in puunan sin kabuhi' niya bukun daing ha batangan iban sanga sagawa' daing ha gamut amun limulubung ha laum sin lupa'. Bang in gamut kahuy nalassun atawa nasud sin mamuhinga' tantu in batangan, sanga, dahun iban bunga di' da umuntayaw. In kabuhi' sin manusiya' damikkiyan, in gamut kabuhi' nila bukun ha pagusaha, ha alta', ha kakaingat, ha panubu' iban ha katan piyapanjari. Adapun in gamut sin kabuhi' sin manusiya' yadtu ha ukum milik sin Allah SWT. Adapun misan yadtu ha Allah SWT awn kunsi' niya ha ginhawa sin manusiya' amun asal awal daan isuk sin Allah SWT, ha supaya in iypun Niya makabalik madtu bang hi takdil Niya. In suntuan sin katan manusiya' ha tungud hal ini amuna in Junjungan Nabi Muhammad Sallawlahu alayhi wasallam.

In katan manusiya' sibu' da hi munapik, hi kapil, hi bar-iman, hi mu'min, in sila katan huwat-huwat ha kabuhi' daing ha Allah SWT. Amura kuman awn na daing kanila in wala' nakahati sin ini, awn da isab in awn panghati sagawa' hawal-hawal pa, damikkiyan awn da isab amun tubus tuud in panghati iban pamaratsaya sin wayruun makapagbaya' iban wayruun dugaing makusug, iban magbubuhi' buat malaingkan amura in Allah SWT.

Bang in bigi sin pagiman gumamut na ha ginhawa sin manusiya', mabiya' na siya manuk-manuk lupad madtu mari, atawa sanam sasab madtumari magparagbus sin kiyatakdil kanila ha adlaw yaun. Sibu' da ha laum sigpit iban hakahaluy di' na sila imiyan "Unu na baha' in jimatu ha sukud nila bihaun". Bang awn aramala hiparatung, magsabal na hadja sila damikkiyan bang awn isab karayawan hi anughara' kanila in hinangun nila magsukul pa Allah SWT.

In katan ha dunya iban sin hakatilingkal alam nagtatagipun pa Tuhan. Adapun in pagtuhan nila magad ha kahalan amun biyaktul kanila sin Allah SWT. Bang in kaawnan niya ista' in pagtag-ipun niya biya' na sin mahinang lamay ha manga manusiya' iban sin kaibanan piyapanjari. Bang in kaawnan niya hilam in pagtag-ipun niya amuna in humuthut dugu' sin manusiya' iban sin kaibanan pa. In aturan kabuhi' biyaktul sin Allah SWT ha kaibanan piyapanjari amuna in dagbus sin pagtaat nila ha Allah SWT.

In pagtag-ipun sin manusiya' amuna in mangagari ha piyangdaakan iban lumayu daing ha liyangan salta' mag-Iman pa Tuhan sin sabunnal-bunnal pag-Iman. Karna' duun ha iman sabunnal tumattap in pagtag-iypun sin hambuuk hamba Allah labay daing ha manga kiyaanughara' kaniya sin Tuhan Ilmu' amun tuput da siya iban Allah SWT in makahati.

Ha kahalan bihaini di' na in hambuuk manusiya' malawa' daing ha panumtum pa Tagdapu sin kabuhi' iban pagingat sin dunya magdaratung. Amurakuman in hinangun niya magpabuntul lagi tattap ha laum panaksii sin kabasaran sin Allah SWT.

Mura-murahan in lawang hidayat sin Allah SWT ukabun niya katu' taniyu ha supaya makaanib daing ha manga hinang amun mangdahi pa hikaig sin lipaga ha pagkannal pa Allah SWT iban pagtagama sin adlaw magdaratung-datung.

Bang awn kasaan iban karayawan sin bissara ha laum ini mikiampun aku pa Allah SWT. Wayra makapagbaya' iban sangat makusug lagi bayng ampunun mapuas daing Kaniya.