Futuhul Ghaib [Pangukab pa amun Ghaib]

Sultanul Awliya Syeikh AbdulQadir Al-Jilani

 Lilayan hika-14

Bismillahirrahmanirrahim.

Wahai kamu amun nahinang iypun sin hawa napsu nila! Ayaw niyu taymaa in baran niyu nakasud pa tumpukan sin manga sila ahli Allah. In kamu hinang niyu iypun in ginhawa pa hawa napsu niyu adapun in sila hinang nila in ginhawa iypun pa Allah SWT in kamu in kahandak niyu dunya adapun in sila in kahandak nila Ahirat. In kamu in piyandang niyu dunya hadja adapun in sila in piyandang nila Tuhan amun nagpapanjari sin langit iban gumi. In kasanyangan niyu nakabutang ha mahluk sagawa’ in kasanyangan nila nakabutang ha Allah.  In atay niyu nakahukut ha ha dunya sagawa’ in atay nila nakahukut ha Allah amun Maha Bassal. In kamu napuhinga’ sin manga kita’ niyu sagawa’ in sila wala’ nakakita’ unu in kita’ niyu adapun in piyandang nila Allah amun Nagpapanjari sin katan pakaradjaan amun di’ kakitaan sin mata. In sila yadtu nakaabut ha maksud sin kabuhi’ iban nakakawa’ kasajahitraan, adapun in kamu masi’ kiyatatabunan ha laum napsu pagdunya sin kamu.

In sila yadtu nalawa’ ha laum mahluk iban daing ha napsu pagdunya iban daing ha kahandak nila kandi, daing ha sabab yadtu in sila nakasampay pa hadarat sin Tuhan amun nagdihil kanila kusug ha supaya makaabut pa duhul sin KaWujud niya in sila saparati taat iban pupudjian pa Allah. Amuna ini in dirihilan sin Tuhan amun hidihil Niya pa hisiyu-siyu in kabayaan Niya. In sila hinang nila in taat iban pupudjian yadtu kawajiban nila salta’ tuy in pamawgbugi nila iban sin partulungan amun dihil  Niya iban in ini wayruun kananaman hunit unu-unu. Daing ha sabab yadtu mahinang na in pagtaat bilang nyawa iban kakaun nila.

Daing hadtu in dunya ini nahinang barakat kanila iban dihilan sila ni’mat sakaula-ula in dunya ini nahinang na sulga’ kanila. Karna’ apabila sila umatud unu-unu, ha di’ nila pa kakitaan, in kakitaan nila amun haliyu iban kakahinang sin Allah amun Nagpapanjari sin katan. In manga tau ini nagdara lutu’ kusug ha gumi ini iban ha langit salta’ makasanyang pa manga sila amun miyatay na iban amun masi pa buhi, karna’ in Tuhan nila hinang na sila lagsak sin gumi amun piyapanjari ini. Daing ha sabab yadtu in sila upamakun bud amun timindug mapagun iban kalagguan niya. Ayaw niyu sila pagsasawa iban ayaw niyu sila langa ha pagpanaw-panaw nila amun misan ina’ ama iban kaawanakan nila di’ makapa’gang kanila daing ha maksud nila. In manga manusiya’ ini amuna in sarayaw-rayaw amun piyapanjari sin Allah SWT ha babaw gumi ini. In rida’ iban kasajahitraan hidihil kanila sin Allah salagi’ awn langit iban gumi.