Nisfu Sya’ban

Bismillahirrahmanirrahim.

Alhamdulillah, puas magrib kaina in tau ha laum kawman nakati’mus na sin pagduwaa Nisfu Sya’ban atawakan adlaw partangngahan sin bulan Sya’ban. Kabiyaksahan na sin sabarang Tausug ha kawman  in pagjamu tumagna’ daing ha adlaw ini sampay pa hinapusan sin bulan. In bulan Sya’ban hambuuk daing ha manga bulan hipu’ sin rahmat iban kaampunan daing ha Allah SWT.

In bulan Sya’ban tanug da isab hipagtitibaw kubul sin manga sila nagkalimun lawa’ na. Misan in pagtibaw kubul wala’ dihilan masa tartantu, adapun ha bulan ini agad in tau daran didtu maglanu’, magbassa Qur’an iban sin kaibanan pa hihinangun. Laung sin manga sila pantuk ha agama in ruh sin manga tau miyamatay makaingat bang hisiyu in miyadtu timibaw pa babaw kubul niya. Bang ha paham sin Ulama’ Ahlu Sunnah Wal Jamaah [Al-Ashaira] jiyari nila in pagtibaw pa kubul iban magbassa Qur’an ha babaw niya. In pagbassa yadtu bukun bilang panumbahi ha tau kiyubul sagawa’ pagpahampit kaniya ha pahala’ sin biyassa. Misan in kaawnan awn simulang sin bihaini kakahinang sagawa’ asal in hinang ini wala’ piyanglangan sin manga ulama’ dakula’ ha dunya.

In bulan ini bang ta tapsilan bilang hambuuk panglaggui iban pagtumtum ha manga sila yadtu minuwi’ hukum. Misan in kaawnan di’ ta kaingatan bang unu in jimajatu kanila ha alam ahirat in mahalga’ yari sila simusubsub ha laum pangatayan. Damikkiyan in kitaniyu buhi’ bihadtu ra isab in hinangun katu’ taniyu sin manga anak apu’ bang kitaniyu magpatud na pa laum liyanglahad.

Laung sin Imam sin Masjid kaina, “Ubus magsambahayang maghrib magpun-pun kitaniyu magbassa Surah Yasin makatu balikan ampa kitaniyu manginduwaa panjang umul, Luhaya lidjiki’ iban duwaa salamat.” Ubus hadja nagsambahayang Isya in manga tau ha laum kawman pamara sin dulang pa masjid ampa in manga jamaah iban sin manga kabataan nagsawu-sawu.

In paghindu’ sin agama way limingkat iban way salian kalna’ nasakup niya in katan tibayhuan sin kabuhi’.  In panghindu’ sin Islam pagkasilasa bukun pagbanta.

Magsukul sin nakaabut pa kitanyu sin bihaini hinang. Mura-murahan madawhat natu’ in kahanungan dunya iban ahirat.

Bangman iyampun sin Allah SWT in katan himumungan ha laum ini.