IMAM DAKULA' SIN BA'ALAWI

Ha Nusulan sin Kapuan Sug, mahumu natu' pagkadungugan in manga kangan-nganan ini, biya' na kan Syarif Auliya', Syeikh Mahadum Aminullah, Sharif Alawi, Sharif Balpaki, Sayyid Abubakar iban sin kaibanan pa. Adapun makulang in daing katu' taniyu nakahati bang in manga sila ini, hinda siyu in nanubu' kanila iban daing hawnu in tiyaykuran nila. Sakarang pa adlaw yan masi-masi pa in manga manulat iban maguuki Bangsa Sug naglalawag katuman sin bayta', misan pa in kaawnan in manga nasabbut ngan ha taas yan kiyabayta' daing sila katan ha hula' Arab.

In pagtag ha manga kaulamaan lagi ahli hakikat ha taas yan bang ha bihaun amuna in Ahlul Bait atawa manga Tau Laum Bay sin Rasulullah, nagsuring sayingsing daing ha apu' niya Sayyidina Hasan iban Husain anak sin Sayyidatina Fatima Az-Zahra binti Rasulullah iban Ali' bin Abi Talib Karamallahu Wajhahu. Ha kahawpuan niya, in manga sila yadtu amuna in pagtagun Aliwiyyin atawa Ba'alawi. Adapun in manga sila ini daing ha tiranan sin Ahlu Sunna Wal Jamaah amun gimagayunggung ha pamaham sin upat Majhab.

Kahapun yaun ha daira Sandakan naawn in adlaw panglaggui ha kapagbata' ha hambuuk Imam Dakula' sin Ba'alawi biya' na kan Imam Al-Qutub Al-Habib Abdullah bin Alawi Al-Haddad nawapat ha adlaw 7 Julkaidda 1132 Hijriya. In hambuuk tanug Kakasi sin Allah ini limahil pa dunya ha 5 kasubangan sin bulan Sappal 1044 H nagagad iban pitsa 30 Julai 1634 M ha Daira Tarim Wadi Hadramaut Yaman.  Bassaha in gukisankabuhi' niya di ha ini IMAM AL-HADDAD .

Mura-murahan daing ha barakat sin kakahinang sin hambuuk Imam Dakula' ini, sumahaya magbalik in kasilasa sin ummat Islam di ha Lupa' Higad [Sandakan] latun pa Kapuan Sug pa manga panubu' sin Rasulullah amun way hali hapagpasaplagan sin panghindu' sin Junjungan pa katilingkal dunya.

Ayaw kitaniyu mainu-inu in ilmu' sin kamaasan natu' kasilasa in kanyuknyukan sabab sin in manga bawgbug nila bunga sin manga piyagtanum sin kaulamaan ha nagpasaplag sin agama Islam amun in diyara Ilmu iban Kasilasa.

Ratib Al-Haddad [Ready to Print]

Yari in Ratib Al-Haddad maraw higanap bassahun puas magalib iban subuh. Kalu raman daing ha barakat sin babassahan ini makakawa' kitaniyu sapaat sin Imam Al-Haddad ha adlaw ahirat labi awla ha sapaat sin Junjungan Rasulullah. Bangman in anak apu' natu' kapusakaan sin Ratib ini ha supaya di' sila malawa' daing ha manga panghindu' sin Rasulullah.

Ya Allah hinanga kami daing ha manga iypun mu malasa ha manga manusiya' kiyakasihan mu. Iban mangayu' kami sapaat daing ha Rasulullah iban daing kan Imam Al-Haddad ha adlaw ahirat. Ameen

Bassa kamu sin kitab niya di http://www.scribd.com/doc/72985101/Adab-Suluk-Al-Murid .