Laung hi Ibn al-Mubarak amun kiyasuysuy daing kan Khalid bin Ma’dan bahawa namung siya kan Mu’az, “Suysuyi aku hambuuk hadis amun diyungug mu daing ha Rasulullah SAW amun hapal mu iban amun tiyap-tiyap adlaw iingat-ingat mu karna’ sin kalandu’ halga’ sin hadis yadtu iban landu’ in kanyuknyuk iban sin laum. Hadis unu baha’ bang ha pikilan mu tuan in labi mahalga’?
In sambung niya: “Maraw na hisuysuy ku kaymu.” Paghuwas yadtu nagtangis naa muna hi Muaz, landu’ in lugay niya nagtangis, paghuwas yadtu, laung niya:
“Landu’ tuud in tumtum ku pa Rasulullah SAW mabaya’ tuud aku magkita iban siya.” Paghuwas yadtu namung na isab siya: “Ha waktu ku nangarap pa Rasulullah SAW, sa’bu siya nangura’ ha unta’ sambil diyaak niya aku sumakat pa angkasun ha taykud niya; paghuwas yadtu minig na aku nagaagad iban Rasulullah simasakat ha unta nasabbut sambil siya imatud pa langit ampa siya nagsabda amun nagdara maksud:
“Pudji iban pagsukul ku pa Allah SWT amun Tagkahandak ha mahluk Niya amun miyamagad ha kahandak Niya oh Mu’az! In jawabku Ya Sayyidal Mursalin.” In Sabda sin Rasulullah: Bihaun hisuysuy ku kaymu hambuuk suysuy kaymu amun apabila hapalun mu hikapagguna mu, sagawa’ bang di’ mu halgaan, wayruun tuud mahinang mu tanda’/daawa ha unahan sin Allah SWT. Hai Mu’az! In Allah SWT nagpapanjari 7 malaikat ha waypa napapanjari in langit iban gumi; tiyap-tiyap langit awn hambuuk malaikat nagjajaga lawang; iban tiyap-tiyap lawang langit yadtu jiyajagahan sin malaikat magjajaga lawang, magad ha kalabbiyan sin lawang iban darajat niya.
Manjari, in malaikat magjajaga ha ammal sin hambuuk iypun, in magsusulat sin ammal niya yadtu sumakat pa langit iban pagda niya ha ammal sin iypun nasabbut amun nagsisi’nag in sahaya niya biya’ upamakun sahaya sin suga. Pagabut pa lawang panagnaan, in malaikat Hafazah amun nagtayma’ in ammal sin iypun yadtu mataud, namudji pa manga ammal nasabbut, sagawa’ pagsampay niya pa lawang sin langit panagnaan; namung na in malaikat nagjajaga sin lawang langit panagnaan pa malaikat Hafazah: “Na’ daplakan na in ammal ini pa bayhu’ sin tagammal, in aku ini magjajaga sin maglilimut, naraak aku di’ pataymaun ha manglilimut pa pagkahi niya, ayaw sampai makalabay kaw tumudju pa langit sumunud.”
Pagubus ha sumunud adlaw awn na isab malaikat Hafazah simakat pa taas langit iban pagda ammal nagsisinglab in sahaya niya, amun tiyayma’ sin malaikat Hafazah landu in taud salta’ piyupudji; in ngi’ sukud pagdatung niya hadja pa langit hikaruwa (amun nakalipuwas daing ha langit panagnaan sabab in tagdapu sin ammal bukun masub maglimut) namung na in malaikat ha langit hikaruwa, “Hundung kaw iban daplakan na pa bayhu’ sin tagammal, sabab daing ha ammal niya yan in siya imangut pagdunya, In Allah SWT nagdaak kaku’ hipatahan in ammal ini ayaw sapay makaliyu pa langit kaibanan”, Daing ha sabab yadtu in katan malaikat nagla’nat pa tau nasabbut sampay pa mahapun.”
Awn na isab malaikat Hafazah simakat pa taas langit iban pagda ammal sin hamba Allah amun mamarahi dayaw, hipu’ sin sadakka, puasa iban indajinis karayawan amun bang ha malaikat Hafazah tiyayma’ bihadtu taud salta piyupudji, sagawa’ pagsampay hadja pa langit hikatu namung in malaikat magjajaga ha langit hikatu:”Hundung nakaw, daplakan nayan pa bayhu’ sin tagammal kaniya, aku na ini in malaikat magjajaga kibir (tau amun abbuhan) naraak aku sin Allah SWT ha supaya in ammal ini di makalabay ha lawang ku ayaw sampay makaabut pa langit sumunud. Dusa niya kandi nagtakabbul siya pa tau dugaing ha laum parhimpunan.”
Paghuwas yadtu, simakat na isab in malaikat Hafazah iban pagda ammal sin iypun dugaing, nagsi’si’nag biya’ bituun dakula’, in suara niya maglagublub, hipu’ sin pagtasbi’, iban puasa, sambahayang, naik hadji’ iban umra. Pagdatung hadja pa langit hikaupat; in malaikat nagjajaga sin langit hikaupat namung: “Hundung nakaw aynakaw lumaus, daplakan na in ammal ini pa bayhu sin tagammal kaniya, aku na ini magjajaga sin ujub (maglaggu’ sin baran ha laum pangatayan), naraak aku sin Allah SWT ayaw sampay makalabay in ammal ini, in sabab niya in tau ini bang magammal daran naguujub.
Pagubus, simakat na isab in malaikat Hafazah iban pagda ammal sin iypun amun iibanan salta’ miyamahil biya’ sin pagiban ha pangantin babai sin bana niya. Pagsampay hadja pa langit hikalima nagdara ammal landu’ in dayaw, biya na sin: Jihad, naik hadji iban umra, misan in sahaya niya magsahaya biya suga. Laung sin magjajaga sin langit hikalima: “In aku ini magjajaga sin sifat hasud (maabughu’ atawa magniyat mangi’ pa kaibanan), na’ in siya yan masub maghasud/maabughu’ pa tau dugaing ha sabab sin ni’mat sin Allah amun dihil kaniya, manjari in siya mabunsi pa amun nagRida’, pa Allah (mabunsi ha ni’mat) Naraak aku sin Allah SWT ha supaya di pasaran in ammal niya yan makalabay ha lawang ku sampay pa lawang dugaing.”
Paghuwas yadtu simakat na isab in malaikat Hafazah iban pagda ammal dugaing, nagdara wudu’ sampurna’, sambahayang mataud, puasa, naik hadji iban umra, sahingga simampay na pa langit hikaunum, in agi sin malaikat nagjajaga ha lawang ini: “in aku ini malaikat magjajaga rahmat, na’ in ammal saula-ula marayaw ini maraw pa diyaplak mu pa bayhu’ sin tagammal kaniya karna in ini kasaan niya kandi bahawa in siya ini waypa bakas kimasi pa tau dugaing, bang awn datungan musiba, in siya magparayaw hadja parasahan (di’ magparuli), in aku naraak sin Allah SWT ha supaya di palabayun in ammal ini ha lawang ku, ha supaya di sumampay pa lawang kaibanan. “
Sambil simakat na isab in malaikat Hafazah pa langit iban pagda ammal sin iypun amun indajinis lupa ragbus sarakka, puasa, sambahayang, jihad, iban pagkawara’, in suwara niya maglagublub biya’ badju, in sahaya niya isab biya’ kilat. Pagdatung hadja pa langit hikapitu namung na in malaikat nagjajaga sin langit hikapitu yadtu: “In aku ini magjajaga sum’ah (amun mabaya’ matanug) sabunnal tuud in magaammal ini mabaya’ matanug ha laum kumpulan iban in siya ini in kabayaan ha taas hadja bang nagkukumpul iban kabagayan amun kasibu’ niya iban mabaya’ kumawa’ kusug daing ha manga kanakuraan, kiyahabalan aku sin Allah SWT hipatahan in ammal niya, ayaw sampay makaliyu iban makalabay pa dugaing, iban in tiyap-tiyap ammal amun bukun malanu’ ha karna’ sin Allah, amuna yadtu in pagtagun riya’, di taymaun iban kabbulun sin Allah in manga ammal daing ha tau magririyak (magpakita’-kita’).
(awn pa sugpat)
0 comments: