Bukun biya’ sin kabiyaksahan, adlaw yadtu in Sultan mabaya’ tuud magpasaula-ula magpahinang ambaraayat. Karna’ mabaya’ niya kasaksian in kabuhi’ ha guwa’ sin astana’. Adlaw yadtu wayruun nakatilas kaniya. Daing ha sabab yadtu laluwasa siya maghibal.. Gimuwa’ na siya daing ha astana’ iban sin pangampu’ niya partangngahan matup na ha panamung sin manga ambaraayat. Ha hambuuk kawman awn kita’ niya pila tau nagkukumpul. Pagsuuk niya, kita’ niya in hambuuk ulama’ sa’bu nagnanasihat pasalan sin alam barzakh. Nagtagha’ isab awn hangkatau dimatung limamud madtu, sambil nangasubu siya pa ulama yadtu.
“Kiyasaksian namu’ in tau kapir ha hambuuk waktu sambil simib kammi ha kubul niya, sagawa’ way kami nakadungug in sila nagsilawak iban way namu’ da isab kita’ in manga pagsiksa’ amun pagiyanun nila sa’bu niyananam niya. Daing ha sabab yadtu biyadiin in dan hipagpabunnal sin hambuuk unu unu amun bukun matup kitaun sin mata? Nagtali’ in ulama sin pangasubu yadtu ampa siya simambung, “Hasupaya kaingatan in manga yadtu subay labay ha pangatud sin mata atay. Kiyaingatan niyu ka in manga tau amun sa’bu natutug? Awn waktu in siya managainup kutkutun sin has, sasatun iban sin kaibanan pa. Ha waktu yadtu makananam da isab siya sakit iban buga’ sambil magsilawak iban dunukun manga hulas. Kananaman niya in hal bihadtu misan bukun ha laum katugan. Adapun in ikaw ha raig niya naglilingkud nakasaksi’ ha kahalan niya saula – ula wayruun jimatu unu unu. Parahal unu in kita’ sarta’ jimatu kaniya nalibutsiya sin has. Daing ha sabab yadtu pagga’ ha tagainup hadja di’ na makagaus in mata kimita’ kaniya, unu makagaus baha’ kaw kimita’ iban mata mu sin jimatu ha laum alam barzakh?
In Baginda’ Sultan kiyahupan ha lilayan sin ulama’ yadtu. In baginda masi dimurungug sin nasihat yadtu. Bihaun limatun in ulama’ pa hal sin alam ahirat. Kiyabayta’ in ha laum sulga’ siyasaddiya in manga kaiibugan sin napsu, lamud na in kalangkapan. Wayruun makalabi lingkat daying ha manga kalangkapan ha sulga’ karna in manga kalangkapan didtu hinang daing ha sahaya. Bang hi banding in lingkat niya in hambuuk hadja mahakutta’ labi in halga’ daing dunya iban sin luun niya. In baginda’ magduruhun kiyahupan.
Minuwi’ na in sultan pa astana’. Di’ na siya makasabar manulay sulay ha kagausan hi Abunnawas. Piyatawag na hi Abunnawas: Duun man siya ha unahan sin Sultan, “in kabayaan ku bihaun da in ikaw madtu pa sulga’ pagubus dahi aku mahakutta’ ha sulga’ amun kiyabayta’ hinang daing ha sahaya. Unu kagausan muka Abunnawas? “Huun Paduka Mulliya.” Timangu’ nahadja hi Abunnawas ha hinang amun di’ kaunun sin akkal. Sumagawa’, laung hi Abunnawas ha Sultan, subay mu isab taymaun in hambuuk sarat pangayuun ku kaymu.” Sabbuta kunu’ in Sarat yadtu, laung sin baginda Sultan.
“Pangayuun sin iypun mu saddiyahan mu aku lawang niya hasupaya in iypun mu makasud. “Lawang unu?” Imungsit in baginda pasal way niya kiyahatihan. Lawang sin alam ahirat. Laung hi Abunnawas. “unu yadtu” nangasubu na isab in baginda’ karna mabaya’ tuud humati. “Kiyamat, wahai Paduka mulliya. In tiyap-tiyap alam awn lawang niya. In lawang sin alam dunya amuna in liang rahim sin ina’. In lawang sin alam barzakh amuna in kamatay. Iban in lawang sin alam ahirat amuna in kiyamat. In sulga’ yadtu ha alam ahirat. Bang kaw baginda’ masi tattap mabaya’ kumawa’ in iypun mu ini kumawa’ hambuuk mahakutta’ ha sulga’ , sumagawa subay makiyamat naa in dunya muna.” Pagdungug sin Sultan ha pagpatarrang hi Abunnawas yadtu dimuhung na hadja in Sultan. Ha ut sin nabingaw hi Sultan Harun Al-Rashid, nangasubu na isab hi Abunnawas, “masika kaw baginda’ magiyan pa sin mahakutta’ ha sulga’ yadtu? Way nagsambag in baginda’ Sultan. Wayna kayba’ sin Sultan, paghuwas yadtu minig na hi Abunnawas sabab sin kiyaingatan niya na in jawab.
0 comments: