Salam Sahawi!

Assalamu alaikum pa sagannap bangsa Sug ha katilingkal dunya. In halaman ini hinang sin kami bilang pagguguwaan sin sahawi marayaw amun mahinang sabab hikasambu sin kiyabibin, hikakusug sin malamma, hikabati' sin natutug, hikasayu sin naligap iban hikapagkasilasa sin nabu'lak. 

Sugpat pa hiyuhuna'-huna sin katan in blag ini ukab pa katan bibissarahun daing naman hapagTuhan, hapagpulitik, hapagusaha, hapagtuntut ilmu, hapagubat, hapaglanu', hapagkasilasa, hapagparagbus sin addat bihasa' (culture), sin adat, iban kahalan sin bangsa Sug hawnu-hawnu na binaybayan.

Huwat-huwat in kami ha kusug iyanughara' sin Tuhan pa Bangsa sug in sila makabangun da isab maghidjatul sin hula, bangsa iban agama nila misan labay hapagblag. Adakala in manga sahawi ha laum ini mahinang ubat pa nasasakit, iban mahinang ganap padduman pa susungun sin unu unu na dautun ha kabuhi', hapagparinta, hapamaybay, hapagagama iban sin kaibanan pa.

Hisiyu-siyu hadja ukab mutang sahawi di ha blag ini labay ha panuguti sin kami. Karna' kalagihan sin kitaniyu mutang pa ini sin sarayaw-rayaw pikilan amun di' mangdahi pa hikabu'lak, fitna iban hipamaba' maba' pa ginhawa sin hambuuk manusiya'. 

In katan sin sahawi niyu patudjuha hadja mari pa email ini: sahawisinug@gmail.com

Magtulung tabang kita niyu magpalanyut sin bangsa daing ha laum katigidluman.