Bukun da isab hi Abunnawas nagsisipat kabus-kabus daran. Awn waktu magguwa’ daing ha laum pangatayan niya in tanda’ sin pagkaSufi niya. Awn waktu bang siya maghindu, mahumu siya magdihil jajawaban mahunit sumagawa’ in pagpasampay niya magaan.
Awn hambuuk murid hi Abunnawas daran nangangasubu sin indajinis pangasubu. Awn waktu magsahawi ra isab siya ha manga himumungan hi Abunnawas misan ha waktu naghihindu’. Jimatu ini ha waktu awn 3 bisita hi Abunnawas amun nangasubu manga pila susualan.
Timagna’ na nangasubu in hambuuk daing ha manga bisita hi Abunnawas
“Hawnu in labi apdal, tau amun himihinang dosa dakula’ atawa tau amun himihinang sin dusa asibi?
“Tau amun himihinang sin dusa asibi’” jawab hi Abunnawas.
Mayta’ bihadtu? laung sin nangasubu
“Sabab in dusa asibi maluhay ampunun sin mahasutci Allah, laung hi Abunnawas. In panagnaan nangasubu yadtu amura in katangu’ sabab sin napuwat ha jawab hi Abunnawas.
Simung na isab pa unahan in hikaruwa bisita nangasubu, in piyangasubu niya biya’ da sin piyangasubu sin panagnaan nangasubu, ““Hawnu in labi apdal, tau amun himihinang dosa dakula’ atawa tau amun himihinang sin dusa asibi?
“In labi apdal amuna in tau di’ himinang sin karuwa-ruwa dusa yan,” laung hi Abunnawas
“Mayta’ bihadtu? Laung sin bisita hikaruwa.
“Sabab bang di himinang sin karuwa-ruwa yan, tantu di’ na kalagihan mangayu’ ampun sin Allah, laung hi Abunnawas, in tau hikaruwa yadtu amunra in katangu’ sabab sin napuwat ha jawab hi Abunnawas kaniya.
In hikatu bisita simung na isab pa unahan nangasubu, in pangasubu niya sibu’ da iban pangasubu sin iban niya, ““Hawnu in labi apdal, tau amun himihinang dosa dakula’ atawa tau amun himihinang sin dusa asibi?
“ In tau amun himihinang sin dusa dakula’ in labi apdal”, laung hi Abunnawas
Mayta’ bihadtu?, laung sin nangasubu.
“Sabab in pagampun sin Allah pa iypun niya sibu da isab in laggu’ iban dusa sin iypun niya” laung hi Abunnawas, in tau hikatu yadtu napuwat da isab ha jawab hi Abunnawas. Naubus man yadtu minuwi’ na sila.
In murid amun masub magpangasubu yadtu missara pasalan sin jimatu yadtu, “Mayta’ in sibu’ pangasubu nakahasil 3 jajawaban nagbibidda’ bidda’.
Iyuyum hi Abunnawas, “in manusiya’ nabahagi’ pa 3 Pangkat, Pangkat mata, Pangkat utuk, iban Pangkat atay’, laung hi Abunnawas.
Unu in pangkat mata yadtu”, nangasubu in murid.
“In hambuuk bata’ bata’ amun imatud bituun ha langit, tantu mamung siya in bituun yadtu asibi’ sabab sin amuradtu in kita’ sin mata niya, jimawab hi abunnawas.
Unu in pangkat utuk yadtu? Imasubu in murid
“In tau maingat apabila umatud bituun ha langit, tantu hipamung niya in bituun yadtu dakula’ sabab sin kiyaiingatan niya,” jawab hi Abunnawas.
“manjari unu isab in pangkat atay yadtu? Nangasubu na isab in murid.
In tau maingat iban paham amun imatud bituun ha langit, tantu tattap niya hipamung in bituun asibi’ misan in kaawnan kiyaingatan niya in bituun dakula’, sabab para kaniya wayruun hangsulag unu unu ha dunya ini in labi malaggu’ daing ha Allah SWT,’ jimawab hi Abunnawas iban paguyum.
Kiyapahaman na sin murid mayta’ in hambuuk pangasubu makajari dihilan indajinis jajawaban. Sagawa’ nangasubu na isab in murid.
“Wahai guruku, magpanipu baha’ in manusiya ha Tuhan”
“Maraih” laung hi Abunnawas.
“biyadiin in hantang niya? Laung sin murid.
“In manusiya’ makatipu ha Tuhan hapagpangayu Kaniya labay hapagpudji iban duwaa”, laung hi Abunnawas.
“Bang bihadtu, hindui aku sin duwaa yadtu, laung sin murid maasubu ini.
In duwaa yadtu amuna in, “Ilahi lastu lil Firdausi a’la, wala Aqwa alannaril jahimi, fahabli taubatan waghfir junubi, fa innaka ghafiruz dzambil adzimi.” (Wahai Tuhanku di aku tupun mahinang tau sin Sulga, sagawa’ di isab aku makasandal tumahan ha pasu’ sin api narka’. Daing ha sabab yadtu taymaa na in tawbat ku iban ampuna na in katan dusa ku, sabunnal tuud Ikaw ra in Jat amun magaampun sin manga dusa dakula’).
Mataud in nagaammal duwaa mangayu’ pa Tuhan ini.
0 comments: