Nagsabab daing ha tagainup mangi’ sin Sultan in hi Abunnawas piyaig daing ha Baghdad. Wayruun mahinang hi Abunnawas. Misan unuhun pa subay niya ra tinggalan in Baghdad danan hadja sin tagainup. Masi pa magulangig in bissara sin Sultan ha taynga hi Abunnawas. “Kabii ha laum indan ku nagbak kami iban maas usug. Nangampu' in maas yadtu juba puti’. Namung in maas in hula’ niya datungan bala’ apabila in tau pagnganan Abunnawas masi nakabutang ha hula’ ini. Subay siya duyun daing ha hula’ ini sabab sin nagdara siya kamalasan. Makajari siya magbalik pa hula’ niya iban sarat di’ siya magpanaw, dumagan, magkamang, maglaksu-laksu iban sumakat kaldai (Donkey) atawa unu unu na jinis binatang panguraan.
Minig na hi Abunnawas sambil binin niya na in asawa iban bay salta’ iban da isab lutu’ amun hiyuna’ huna’ niya makainihan na. Amura in nahinang sin asawa hi Abunnawas nagtangis. Duwaa adlaw na in lugay hi Abunnawas nangura’ ha Kaldai niya. In lutu’ diyara niya inut-inut na nimipis. Wayra tuud piyahup hi Abunnawas ha pikilan in pagduy kaniya. Sumagawa’ gamman na in yakin niya bahawa Tuhan da in labi makusug makapaig kaniya daing ha kasigpitan nakaginggu’ sin pikilan niya.
Bukunka wayruun na iban amun labi marayaw daing ha Allah SWT ha manga waktu bihadtu? Limabay pila adlaw hi Abunnawas ha hula’ sin Tau, timagna’ na in tumtum nananap ha bigi jantung niya. In tumtum niya maglulugay magduruhun. Mahunit niya kasaggaan. Asal wayruun dan dugaing amun labi marayaw daing sin subay pikilun. Sumagawa’ pikilan biyadiin baha’ in hikalappas niya? Bihadtu in pangasubu hi Abunnawas ha laum atay niya. Unu baha’ mangayu’ aku tabang magpaampupu’ ha tau dugaing sampay pa astana’ sin Sultan? Di manjari! Wayruun misan hambuuk tau mabaya’ himinang hadtu. Subay ku tabangan in baran ku kandi ha di’ na manaabbit pa kaibanan tau. Ha adlaw hika 19 nakabaak hi Abunnawas hambuuk pikilan amun way nakasud ha piyanglangan hi Sultan Harun Al-Rashid. Ubus niya man nagmumus timudju na hi Abunnawas pa hula’ niya. In tumtum iban sannang naglamud na nahinang hambuuk.
In tumtum amun daying ha angay ini nagkulinyam magduruhun in kusug karna’ sin magsusuuk na siya pa kawman niya. Landu’ kiyugan in tau ha laum hula’ pagingat sin nakabalik na hi Abunnawas. Nahiyul na in kawman paguwi hi Abunnawas pa hula’ sampay dimatung na pa taynga hi Sultan Harun Al-Rashid. In Sultan kiyugan da isab pagdungug sin habal misan bihadtu awn da daawa niya nakabidda’. Ampa in manga raayat landu’ nagkugkuyag sin paguwi hi Abunnawas, sabab sin kalasahan siya sin raayat. Adapun in Sultan kiyugan hapaguwi hi Abunnawas karna’ bihaun di’ na makapuklas hi Abunnawas daing ha hukuman. Sumagawa’ in Sultan nasusa iban biya’ sin piyukpuk pagkita’ niya ha hantang sin paguwi hi Abunnawas pa hula’ niya. Way natali’ sin Sultan mapikil hi Abunnawas in mintayung ha tiyan sin kaldai. Daing ha sabab yadtu nakalappas hi Abunnawas daing ha hukuman sabab sin way siya nakadugtul liyangan sin Sultan. Karna’ hi Abunnawas way nangura’ ha Kaldai.
0 comments: