Magparayaw Pangatayan, Magbalik Pa Tuhan

Bismillahirrahmanirahim

Salawat iban salam ha Junjungan Rasulullah, pa manga ahlul bait niya, kaum karabat, pa manga kakasi sin Allah ha nakauna sambil pa bihaun, pa manga ulama haq, iban pa manga mukali’ amun di’ magbugtu’ in pamandui nila ha manga kulang in pangita’.

In kunsi’ sin kalimayahan tumagna’ ha ginhawa baran. Sabab duun natu’ kabaakan in pagbahasahun sin kaulamaan in “JIHAD AKBAR” atawa jihad salaggu’-laggu’.  In pagjiharan bukun napsu sagawa’ amun yaun himihigung hagas ha napsu ha supaya makahinang sin langgal pa sara’ sin agama. Sagawa’ in timampal pagjiharan napsu, hangkan na awn magiyan napsu mangi’ atawa mulakab. Di’ da isab makajari pagjiharan in napsu samata-mata, sabab bukun in katan napsu mangi’.

Ha laum sin ginhawa baran kabaakan in pagjimpulag ha antara’ sin mangi’ iban marayaw. In daut sin hambuuk daing ha duwa amuna in tumayimbabaw mamarinta ha katan katiluagan sin pamaranan daing ha lahil pa batin. Hisiyu-siyu in dumaug siya in magSultan ha laum kabuhi’ sin hambuuk manusiya’.

Biyayta’ sin Qur’an in atu limaya sin bangsa manusiya’ amuna in syaitan. Wayruun hangsulag manusiya’ in di’ mahinang atu sin syaitan duun na in kaawnan niya guru agama atawa bukun. Sambil hadja pa adlaw kiyamat in syaitan masi-masi in paglugtu’ niya bangman awn mara niya sumud pa laum api narka’ Jahannam.

In ginhawa sin manusiya’ amuna in piyapanjari liyangkap sin Allahu Taala sin indajinis kalangkapan sibu’ da matampal iban sin bukun. Ha laum sin ginhawa asal awn pamarinta amun nagparagan sin katan kalalagihan sin hambuuk manusiya’ lugay niya di ha dunya. In Sultan ha pamarinta ini amuna in akkal in Wajir niya amuna in atay. Bang in pamikil sin panghu’ kumangi’ damikkiyan in Wajir niya sa’ magad. Hangkan na piyamung sin Junjungan “ha laum baran awn dugu’ nakukumpul bang in siya dumayaw, dumayaw in katan, damikkiyan bang siya kumangi’ in katan magad da, in siya amuna in atay”.  In biyayta’ duun atay sagawa’ wayruun tiyugila’ hisiyu in magparayaw iban hisiyu in magpakangi’.

In Puntukan nakura’ iban sin kanakuraan ha babaan niya di’ makajari magtungkakali in hinang. In sila miyamagad ha daak sin kusug Nakatapuk.  Sibu’ da in akkal makabatuk pa Tagdapu sin hibal atawa masasat ha bayntungaan sin satru’ limaya, in kuhibal ha laum baran masi dimadagan amura kuman bang in Sultan masi limulublub ha basakan sin satru’ in baynat niya amuna in kumangi’ in laum baran sambil in kaawnan sa’ sila hidasuk pa baga kayu lanuan biya’ sin kaina tagna’ kapahantang kanila. Damikkiyan bang in Sultan makabatuk sin dan madtu pa Sultan sin Sultan amunain dumayaw in katan daing ha laum sambil paguwa’ sin baran.

Hangkan na in manga sila mukali’ nagtapsil ha parman sin Tuhan “Inna lillahi wa inna ilayhi rajiun” magkulang maglabi “Sabunnal tuud in kami kapunyahan sin Allah iban harap da kami pa Allah magbalik” [2:156]. In pagbalik pa Tuhan ha pangatud sin manga mukali’ bukun subay magtungpad na in duwa siki amun hi hatud na sin kalawlahasiyaan pakubul. 

Adapun salugay buhi’ pa di ha dunya kalagihan in subay kita magbalik madtu Kaniya. In pagbalik madtu bukun hakalahil sagawa’ ha batin. In hantang pagbalik sin batin madtu pa Tuhan amuna in Jihad salaggu’-laggu’. Pataya in baran mu ha di’ pakaw mapatay [Mutu Qabla Anta Mutu] amuini in dan niya. In pagpatay di nasabbut bukun mu tangsuun pugusun in katan sin kainginan mu wala’ imamu ha sara’, sagawa in piyagmaksud di patayun amuna in pa sugpatun in akkal nasabbut ha taas madtu pa Puunan niya. Sabab bang in akkal mapatay na duun hakaTunggal sin Nagpaawn kaniya, in napsu’ mangi’ misan di’ pugusun inut-inut matangsu’ daing ha ginhawa.

In kalagihan sin katan manusiya’ amuna in mangagari ha hinang sin Junjungan Rasulullah daing ha lahil pa batin. Dih kalagihan in magaru jawab ha laum sin pag-agama, sabab in pag-aru jawab hambuuk sanjata’ sin syaitan mahinang dan hikabu’lak sin pagkasilasa ha antara’ sin hangka agama.

In katubusan sin pagparayaw pangatayan labay ha akkal himaha’gum ha Katunggal sin Mahasussi Allah.

Bang awn wala’ imamu suran niyu ha ampun iban maap, mahuli hisuhud ku pa Tuhan bangman ampunun niya in katan hilalaungan kiyadukut ha laum ini.