Bala' Huling Jaman

Bismillahirrahmanirrahim

Alhamdulillahi Rabbil alameen, wassalatu wassalamu ala asrafil anbiyai wal mursalin Sayyidina Muhammadin wa ala alihi wa ashabihi ajmain.

Bunnal baha' in agi sin kaibanan halul akkal in huling jaman amuna in “Balaujjaman” atawa jaman hipu' sin bala'? Unu baha' in piyagmaksud “hipu' sin bala'? Sabab baha' sin daran magjatu paglinug, hangin tawpan, dagat magsulig iban paglahu'?

Bang ha atud sin manga Muslim halul akkal in ngiyanan bala' bukun hadja amun manga nasabbut ha taas yan adapun in sanahut-nahut na bala' biya' na sin kugdanan in baran sin sakit pagkatul atawa kutuhun in buhuk. Ha kahawpuan niya unu-unu in jumatu ha baran amun di' na siya mabilang daing ha likusan sin marayaw makajari na yadtu kirahun bala'. 

In bala' salaggu'-laggu' jimatu ha ummat bihaun amuna in nalawa' in pangandul ha Nagpapanjari kanila. Agad kamatauran sin manusiya' tarbilang na in kamatauran sin bangsa Muslimin nakasiha' na daing ha ini. Mataud na Muslim nalamin sin pamikilan sin tau sadlupan, amun magparatsaya hadja bang awn bukti' kakitaan [To see is to believe], adapun bang wayruun magtuy kaw iyanun unu' laung na in tanda' hikapakita' mu. Mataud naggugulal namawgbug ha Qur'an iban Sunnah sagawa' in paljantangan biya' da hal sin manga tau puti', gampa in tau puti' amun kiyahidayatan sin Allah SWT pa dan mabuntul [Siratal Mustaqeem] napinda ayaw sin amun luggiya' Muslim gamman magduruhun in akkal kiyatabunan sin kasipat-sipatan bukun marayaw. 

Baha' amuna ini in pagiyanun sin kamaasan “Halli' kamu sin pamiat daing ha taasan hangin, maluuy bang mu dungugun in parkaulan nila, sagawa' in diyara nila hikakapir”.

In kamaasan nakauna wala' da isab nasalamat daing ha bala', sagawa' in hakatilibut nila timatayimbabaw in pangandul iban paghuwat-huwat pa Tuhan. Sabab in kaawnan nila bukun biya' sin kitaniyu amun masub magpaguwa' hilalaungan misan wala' kapahami marayaw unu in piyasampay. Di' sila maggulal guru bang in kaawnan bukun sila pantuk, susu' labi pa bang magpasampay sin agama. Sabab in agama kikila nila bukun ha pais, bukun ha maana, bukun da isab ha pamakay. Sagawa' in Islam ingat nila amun yadtu ha hadarat sin Tuhan [Innaddina indawlahil Islam]. Unu in yadtu ha Tuhan tantu di' magbaluba, di' magkapinda salta' daran matup pakatan jaman.

Hawnu in kaIslam sin kitaniyu bihaun miyumutang? In kaIslam natu' tunga'-tunga' [tabiya' ha bukun]. Hangkan tunga'-tunga' paratsaya kita Allah SWT in puunan sin katan sagawa' in hulat-hulat natu' harap pa mahluk iban sin katan piyapanjari. Paratsaya kitaniyu agama in makapasanyang sagawa' bang in pagbissarahan pagparinta di' natu' palamuran sin agama, iban pagiyan sin kaibanan in yan agama in ini pagparinta. Bukun ba yan biyayta' ha laum sin Qur'an [Rabbil Alameen] Tuhan sin katilingkal alam? Tuhan amun Tagmilik iban Tagkawasa sin katan. Nakapakain na in pangilahi ha Kakawasahan sin Allah SWT bang in pamaham natu' in pagparinta iban agama di' magagad? Bukun baha' ini Sirik satampal-tampal?

Hangkan na ha bihaun kulang na in makatayma' sin pagbuhi' magbalik sin pagSultan atawa pagKhilafa. Sabab in undul niya in manga aturan pamarinta ini bukun na matup ha jaman ini laung sin sila. In matup subay kunu' “Democracy” amun nagdara pamikil “Pamarinta sin tau daing ha tau, harap pa tau.” Hawnu na in Tuhan ha bihaini hantang?

Duun na ha bihaini hantang in bala' salaggu'-laggu' jumatu sabab in pagparinta wala' piyangandul pa Tuhan. Tanda' in manusiya' ha jaman ini kulang na in mahugut in pangandul pa kakawasahan sin Allah SWT. Sabab in piyagpasaplag bihaun labi awla ha palihalan agama amun pais-pais, hangkan sa in pagyakin pais-pais da isab. Pagsud pa laum Pagpangadjian Tausadlupan [Western Education] in pais-pais yadtu kamawmuhan malaknit biya' lubag bang hilugun na. Awn waktu in manga Muslimin amun nagmamatuyu' magparayaw sin pagyakin pa Tuhan iyanun sin manga Syeikh nila “Laung”. Malaingkan in nangiyan laung yadtu ha pais da isab gimagayunggung. Bang ibarat “Battery” maluhay magkapasaw, subay hadja nagsa”charge” ampa makusug. Bang kakitaan sin duwa mata bunuun in pagkahi hangka agama imiban pa ha satru' mamikilan bangman masalamat in kakayaan iban pagkawasa ha hula' nila.

Amunaini in paljantangan sin kitaniyu bihaun, sabab sin kulang na in nakabatuk pa Iman di' maghajat “Charger” timaud na in bala' jimatu katu' taniyu, sibu' da daing hapagpangadul pa Kakawasahan sin ALLAH SWT sambil hapagkasilasa agad mahunit na patubuun.

In baga kayu bang sumaplag in baynat makasunug. Magpatilbun kitaniyu daing ha manga bala' jimatu ini. Magbalik kitaniyu papagyakin sin Kanabihan, Kasahabatan, iban sin manga Kakasi sin Allah SWT. Magpataud kitaniyu sin panginduwaa mura-murahan makabati' kitaniyu daing ha laum tagainup hipu' sin bala' ini.

Pagmaapan dakuman bang awn wala' imamu. Mikiampun aku pa Tuhan ha manga hilalaungan kiyalimpal ha laum ini.