Palgantaan

“Bang in sukud mu pansing, pansing da, di’ da mahinang gantang”

Bismillahirrahmanirrahim

Alhamdulillahirabbilalameen wassalatu wassalamu ala asrafil anbiyai walmursalin sayyidina Muhammadin wa ‘ala alihi wa ashabihi ajmain.

In dunya bihaun hipu’ sin kagalib-galiban agad nasakup in katan tibayhuan kabuhi’ sin manusiya’. Ha bihaini in kahalan sin dunya bukun nagmaksuri wayruun da isab nasakup sin Tagdapu sin katan – Allah – adapun biyutang niya in manusiya’ daing ha hambuuk kahalan pa hambuuk kahalan ha supaya niya manilay bang hisiyu daing kanila in maingat magsukul ha manga pargantaan kiyaganta’ Niya.

 “Sabunnal tuud, piyapanjari Namu’ in katan iban parkadalan nila” [54:49]

Sambatan da sin papata kiyadukut ha taas, “Bang in sukud mu pansing, pansing da, di’ da mahinang gantang”. Ha palihalan sukud in tiyap manusiya’ ha paghuwas kapaawn kaniya mari pa dunya dirihilan na siya sin katan kalalagihan niya ha kabuhi’ sibu’ da in kaawnan mangi’ iban marayaw. Amura kuman in manga sukud ini kasayuhan sin manusiya’ labay ha dagan sin kabuhi’ niya adlaw-adlaw. In tanda’ niya awn daing ha manga manusiya’ piyaganak bukun ha kaluwalga’ dayahan sakali limugay man siya ha dunya nahinang siya hambuuk daing ha manga balkanan ha dunya. Damikkiyan awn da isab limahil daing ha kaluwalga’ balkanan sagawa’ limaas halaum karukkaan atawa miyatay ha laum sin kasigpitan.

Awn daing ha manga manusiya’ magpakatali’ “Bang laung na di’ kaw magplanu sin susungun mu atawa di’ kaw magpaiskul anak in susungun mu bukun masawa”. In akkal bihaini bang ta hisud pa pahaman sin manga naghuhulat-hulat ha Tuhan maituung siya hambuuk dan hikapagsirik pa Tuhan bang timudju pa dugaing in I’tikad. Karna’ bukun planu iban pagiskul in makapasawa sin susungun sin tiyap manusiya’. Adapun in makapasawa iban makapatigidlum tuput tunggal Allah. Bang in hambuuk manusiya’ nagkarayahan sabab sin maingat maplanu atawa sabab sin nakatalus siya nagiskul, bukun nagmaksuri in manga yadtu daing ha sukud sin pagplanu iban pagiskul niya, sagawa’ in yadtu lamud ha takdil kaniya sin Tuhan Maha Kaya.

Subay tuud di’ kitaniyu malipat daing hapagkannal pa takdil sin Tuhan ha supaya di’ kitaniyu mahinang iypun sin hawa napsu. Sabunnal tuud in hawa napsu amuna in mangdahi ha manusiya’ pa laum katigidluman. In sukud mu kaymura di’ da makapadugaing, damikkiyan in sukud sin dugaing di’ makalatun kaymu bang bukun daing ha pargantaan sin Tuhan Maha Mura.

Manaw kitaniyu ha dunya sakaula-ula in kitaniyu upamakun hambuuk “Artista” amun miyamagad ha luun sin “Script”. In nagsusulat sin “Script” sin kabuhi’ natu’ wayruun dugaing daing ha Tuhan Maha Buhi’. Ayaw mu limbangi in Tuhan sin kaput dunya, kawasa, kamiskin iban kadaya. Karna’ bang in manga yan inig kaymu, tantu wayruun tuud suku’ mu misan biya’ hanglup.

Bang awn kasaan sin himumungan ini suran niyu pa ampun iban maap. Labi in Tuhan pangayuan ku kaampunan ha manga lapal kabtangan ha laum ini.