BAUTAN KASILASA

Bismillahirrahmanirrahim. Alhamdulillahirabbil Alameen Wassalatu Wassalamu ala Asrafil anbiyai Wal Mursalin Sayyidina Muhammadin Wa ala alihi Wa ashabihi Ajmain.

 “Iban daing ha manga katanda’-tandaan Niya amuna ini, piyapanjarihan niya kaw limbang daing ha antara’ niyu, ha supaya kamu maghula’ ha laum sin kahanungan iban sila, iban biyutangan Niya Kasilasa iban rahmat ha antara’ niyu [Pangatayan]: Sabunnal tuud ha laum yadtu amuna in katanda’-tandaan ha manga sila magtatali’. Al-Rum:21”

Manga palanggungan hangka agama pandugahan natu’ in bayta’ sin Allah SWT ha panapsil sin manga kaulamaan, ampa natu’ hisugpat pa kahalan jimatu ha bangsa iban hula’ natu’. Kalu magsabab daing ha ini dihilan kitaniyu sin Allah SWT sin panghati sawasa’ amun mahinang sabab hikaparagbus natu’ sin kasilasa magtupan iban kabayaan sin agama. 

In Islam amuna in agama miyulliya sin Allah SWT iban piyagrida’ Niya pagagamahan sin sagannap Manusiya’ way pagkira dagbus iban walna’. Hisiyu-siyu in gimuwa’ daing ha Islam sila na in salugi’-lugi’ muwi’ pa adlaw hukum. In pangagari ha Islam amuna in pangagari ha Junjungan Rasulullah. Wayruun ibadat pa Tuhan taymaun bang kimiyas daing ha dan liyabayan sin kakasi Niya. In Rasulullah asal awal daan nakasaksi’ ha agama sabunnal, piyagbata’ siya pa dunya ha supaya magsampulna’ sin kiyasaksian niya hakaawal. Hangkan na in Rasulullah suntuan daing ha awal [Ma’rifat] pa ahil [Syariat].

In pagpapanjari ha Manusiya’ amuna in salingkat-lingkat iban sarayaw-rayaw. Daing ha kug iban baya’ ha antara’ sin duwa maglakibini nakahasil sila tubus manusiya’ amun isukan sin Allah SWT sin Kasilasa daing Kaniya. In Kasilasa sin Tuhan mahayang matampal yan kikita’ sin duwa mata, kananaman sin pangatayan, karungugan sin taynga iban sin kaibanan pa.  Bang in hambuuk manusiya’ makasud na pa akil balig wajib na kaniya in tumunay sin pardaakan sin Tuhan ha supaya in nyawalihan niya maanad magbak iban sin Tuhan Nagpapanjari kaniya ha laum sin pardaakan. Bang ha lugay himihinang di’ pa siya makatilag sin pagbak nila, asal siya dirihilan banda’ daing ha Nabi kalasahan in “Fardu’ pa satiyap Muslim usug iban babai in manuntut Ilmu.” Ha supaya in pangilahi niya pa Nagpapanjari kaniya maghuhugut sambil makabalik siya pa Tuhan di pa ha adlaw dunya. In pagsambahayang amuna in matuk pakasampurnaan sin ginhawa amun didtu kabaakan in gamut sin Kasilasa. Hangkan na in Kasilasa sin Tuhan asal niya piyauuna ha di’ pa in manusiya lumahil pa dunya.

In puunan sin Kasilasa daing ha Tuhan. Wayruun hangsulag unu-unu ha dunya ini magpahibal sin katan mapuas daing ha Allah SWT. Bang in kaawnan sin hambuuk iypun malawa’ daing ha tiranan panghindu’ sin agama sabunnal in siya mabilang nakalayu’ na daing ha kasilasa sin Tuhan. In paglasa pa Tuhan subay  bukun tuput kananaman hadja sagawa’ subay tuud kasaksian sin pangatud batin ha supaya di’ maawn in pagduwa ruwa ha pangatayan niya. Karna’ bang hat da pananaman awn buli rapat mapalling da pa dugaing. Karna’ in paglasa hat magnanam ha way panaksii biya’ da kaw sin imiyan ‘masarap kaunun in biyabas, sagawa’ wala’ kaw nakakinam sin biyabas pagtagun’. Sambat da sin hambuuk mukali’ Buranun “Ayaw kaw missara sin way mu kiyasakupan, bat kaw di’ makabaak dusa.”

Hangkan na in Junjungan Rasulullah dihilan dan sin Tuhan nakapagbak iban Siya ha waktu pagMi’raj. Sabab in kalagihan didtu amun magkitai in nagkasilasa. Karna’ hapagbak yaun makahasil sahugut-hugut pangandul pa Tagdapu sin katan. In kariyasali sin manusiya’, misan pa siya limalabtik sin Kalimah, asal baluba. Duun da siya di’ magbaluba bang niya kasaksian sin panaksi’ sabunnal in Nagpapanjari kaniya.

Ayaw kitaniyu mainu-inu manga taymanghud ha masa natu’ bihaun paglag-lagun natu’ na in bautan sin nakauna. In sila nakauna takdil magtuntut ilmu’ bukun in maksud nila magtuntut ilmu’ ha supaya lagguun sin pagkahi nila atawakan ha supaya makahasil alta’ mataud. Sagawa’ in sila manuntut ilmu’ ha supaya dumayaw in parsugpatan nila iban sin Tuhan. Bang sila makadagpak na pa maksud, paguwi’ nila pa hulaan kawaan sila sin manga kamaasan nila Imam Muallam ampa sila hipatajakki bang bunnal da sila dimagpak na ha pagtuntut ilmu’. Bang hakiraniya way na sahawihun sin Imam Muallam, in sila hinangun na isab Imam atawakan pangagaran ha laum hula’ daing ha panuguti sin Sultan.

Ha jaman natu’ ini bukun na bihadtu, tabiya’ dakuman, awn daing ha kaibanan manuntut ilmu’ bukun in hajat dumagpak pa Tuhan, sagawa’ mangislam ha pagkahi niya amun mahugut na asal in pamaratsaya ha agama. Sagawa’ in kaIslam duun kaniya di’ niya matantu bang baluba ka atawa bukun. Hat hadja makalabay ha madrasah di’ na kautan in pagliki’-liki’ iban pama’tali ha hinang sin kamaasan nila amun dagpak in paglasa ha agama. Ampa in pagpasampay sin agama sin sila nakauna bukun magtuy iyanun in pagkahi Sirik atawakan Bidaah. Sagawa’ ambitun nila maraw in tau panduan ampa inut-inutun pindahun daing ha laum sin kasilasa iisukan panghati. Ayaw kitaniyu mainu-inu mayta in manga nagpamiat pa hula’ nakauna wala’ da tuud kiyahunitan nagpakita’ lingkat sin Islam pa kamaasan. Sabab in sila nagdara sin sataud-taud kasilasa daing naman ha paglabtik sin dila’, pa parkaulan iban na sin parniyatan.

Subay natu’ di’ butawanan in bawgbug sin kamaasan natu’. Sabab in pamaham nila guwa’ daing ha baktulan sin manga Kakasi sin Allah biya’ na sin upat Imam iban sin manga Tau Laum Bay [Ahlulbayt] sin Rasulullah. Bang kitaniyu mabaya’ humati hinda siyu in tanug Tau Laum Bay sin Rasulullah kitaa niyu in kaulamaan ha jaman ini biya’ na kan Habib Ali Al-Jufri [Yemen], Habib Umar Al-Hafiz [Yemen], Habib Munzir Al-Musawa [Indonesia] iban sin manga kaibanan pa yari ha liyukupan sin dunya. Sila nayan in panubu’ sin Junjungan amun maraw in pamaham ha bawgbug sin Rasulullah. In manga kaulamaan ini nagdara sin sataas-taas kasilasa pa manusiya’ iban hanunut in pagpasampay biya’ sin paghinangun sin kamaasan natu’ ha jaman nakauna.

Bang kitaniyu mabaya’ dumayaw in paghula’ natu’ magbalik kitaniyu pa bautan sin sila nakauna ha supaya in mahinang nakura’ sin kaapuan natu’ bukun kulang in kasilasa pa raayat iban pa hula’ kalasahan biya’ sin kiyajamanan natu’ bihaun. Bang hadja in kasilasa sin kanakuraan iban sin sila naggugulal makahati tubus tantu di’ kitaniyu mapulaug daing ha laum paghula’ maglawag sin hikasanyang natu’.

Iban namung siya: “Pini’ ku liyasa in hinang marayaw ha panumtum pa Tuhan ku; sahingga malawa’ sila daing ha pangatud ha taykud sin taming. [As-Sad:32]

Mura-murahan pakusugun sin Tuhan in paglasa natu Kaniya iban pa Junjungan Rasulullah pa manga Tau laum bay niya, pa manga kakasi sin Tuhan. Mikiampun aku pa Tuhan ha manga karayawan iban kalaungan ha laum sin siyulat ini.