GIIK KAW HA ALAM NYATA'

In kita subay gimiik ha alam nyata' ayaw kita managainup sin pulak-pulak adlaw. In katan sin pagtagama lahil iban batin subay sampulnaun iban pakusugun. Ayaw kita mahinang biya' sin magjijimpulag Islam ha Jaman nakalabay, in pamikil nila hinug, sagawa in sapan sin pagluwas-lungsad nila pulakkanat. In sila magtagainup hadja sin daraugan bukun magsaddiya sin baran dumawhat sin daraugan. Daing ha sabab yadtu ayaw na mag-angan-angan way luun sagawa' subay magniyat iban mag-angan magpatindug sin kalimah Allah. Hinduan ta in panaiban magpikil mabuntul iban gumiik ha gumi kasabunnalan, bukun gimiik ha gabun naglulupad. Wayruun tuud makatasak ha gabun mapuas daing ha kumik.

Ayaw ta pasaran in manga kumik-kumik magda dungan sin pagluwas lungsad. In kumik tuput da sanjungun ha waktu way lingug, bang ha waktu na hiluhala' wayruun na magparuli ha kumik. Butangan pa sapan ha unahan in manga mujahid sabunnal pandui sila ha supaya awn sungan. Paguwaa sila daing ha manga Zawiyah sin Tasawuf, gantii in badju' nila darwis sin pamakay hipagbubunu', daha sila pa mayran sin pagluwaslungsad pa laksuha sila pa gi'tungan sin raayat ha supaya nila kasulayan in kapandayan nila amun tiyatawu' salama ini. Pa sibuga pa ulihan hisiyu-siyu in ginhawa nangluyluy na iban amun di' hikapaglagi gantii sin manga pamayhuan ba'gu amun labi in kamdus sin umagad jihad nila.

Taymanghud atud kaw pa lawa iban pa tuu pa unahan iban pa ulihan iban pa baba' pandugahi bunnal-bunnal in manga nagtutuyu' nagluwaslungsad bandinga iban sin manga sila tumpukan nagbawu'-bawu' hadja. Pasti-a ha supaya kaw di' mahilu sin pangampu' nila ha guwa'. In waktu ini waktu hipagsa-sa', magsa' sin jatti iban sin bukun jatti. Ha supaya tuput da jatti in makasampay pa duhul sin dan. In labi mahalga', atura in ginhawa baran mu kandi bang tumpukan hawnu in kiyalamuran mu, ayaw hadja maingat kaw magdaak ha tau dugaing buat malaingkan in baran mu kandi naglalamugay iban lummi'.

Haji Abdul Halim Abas