Pangadji' Ha laum Karulawan

In katan sanglit iban pudji tuput Tunggal pa Allah SWT. Salawat salta' salam pa Junjungan Nabi Muhammad. Iban pa manga sila nakabatuk sin bawgbug niya.

Hipagari-ari hadja in patta' sin karulawan

In "Pangadji' Ha laum Karulawan" amuna in pagbahasahun Ilmu' Mukali'. In sipat sin pagpangadji' bihaini bukun siya humput bang ha atud sin manga tau manuntut ilmu' dunya. Adapun in kahumput bukun nakabutang duun ha lingkuran iban ha pagsusulatan digpi' malakbang atawakan hapaggawi adlaw-adlaw paiskul sin manuntut biya' sin kabiyaksahan sin manusiya' ha jaman ini. In kahumput niya nakabutang ha aturan amun tiyattap sin hambuuk guru pantuk maun pa murid niya. In magtuntut ilmu' ha laum karulawan bukun nagdara' maana bat subay ha laum karulawan manuntut ilmu'. In kabtangan ini nahinang siya hambuuk gulalan bilang hipagpinig daing ha manga ilmu' magkatuntut ha madrasah atawakan iskul. Baha' in manga Abid nakauna, magpanghindu' ha laum karulawan atawakan ha laum katian atawakan diin-diin lugal in katanaman iban karuunan nila.

Bang urulun in limpa sin Junjungan piyabatuk pa kasabunnalan sin Allah SWT. Wayruun mabassa natu' bat in Nabi Muhammad SAW nakagraduate ha unu-unu tanug pagpangadjian. Adapun biya' na sin kiyalukis ha laum kitab sin manga magsusulat nusulan, in Junjungan nakadagpak pa Kasabunnalan timagna' daing ha pagbaltapa niya ha Sungab Hira. Sambil in aturan pagBaltapa ini singuran sin manga ummat niya daing ha jaman pa jaman ha supaya makaurul ha bawgbug sabunnal amun nakabutang haliyu sin kabtangan iban maana.

In Lupa' Sug asal daing tagna' tanug ha ilmu' kabatinan lagi mati'gul maglawag sin panghati palihalan pagTuhan. Natarbilang na daing ha manga adat nila in magtuntut Ilmu'. Magtup da isab iban pangdaaki sin Nabi Muhammad ha kiyariwayat sin manga maghahapal hadis, "In pagtuntut Ilmu' Fardu' pa Muslim Usug iban Babai".

Hangkan na misan ha laum karulawan atawa haka budburan atawakan hapagjikilan atawakan tumulak pa kalayuan tuyuan sin Bangsa Tausug. Ha supaya di' maluppas in kabuhi' nila ha dunya salta' makabalik sila pa kaawal nila.

In Panghati masawa magkakawa' ha laum karulawan amuna in bawgbug panghati sin Rasulullah. In katan ilmu' mapuas daing ha bawgbug yan, mabilang pagdunya salta' in manga yadtu labayan hadja sin manga sila maglalawag amun asal awn panduga sin kasabunnalan. Awn da isab in magpikit ha sihir iban magpapikit duun ha hambuuk kahalan apabila awn na kakitaan niya maniyu'-tiyu' barakat sin ilmu' duun kaniya. Adapun ha manga sila asal awn panilag di' mawgbug sin ma bihadtu karna' natali' nila wayruun da in magkahinang batu ha adlaw dunya. In katan barnyawa misan biyadiin in dakmul sin pais niya bang dumatung in ajal tantu di' niya ra hikapaglagi in ilmu' niya.

Bihan in maniyu'-tiyu' palihalan sin Ilmu' ha laum karulawan. Mura-murahan papagbatukun kitaniyu iban sin manga sila kakasih sin Allah SWT yan napulahug iban sin kakahinang nila imuyun ha kabayaan sin Allah SWT. Bangman kitaniyu iyampun sin Allah SWT katantan.