Manara KLCC


Hiyangad ku in o ku imatud sin manara kambal sin KL piyagbantug bukun hat sin Malaysia saplag pa Muslim ha dunya. Ha baita' sin manga kakampungan daying ha Sabah, awn daying kanila Tausug nakaagad nagbangun sin manara labi 80 pangkat ini.

Piyaghantang ku in taas sin manara bihadtura isab in taas atawa labi pa in taas sin darajat sin hambuuk ilmawan ha pangatud sin tiyap-tiyap tagamata. Hangarun pataas iban paghuwat-huwat sin bukun hat lasiya' in makahangad sampay pa sagannap manusiya'.

Timasdik pa atay ku biyadiin in manga kaanakan wayruun pangirab ha ilmu' dunya ahirat? Biyadiin na in kaanakan wayruun nabulat in mata ha ilmu'?

In manara kambal nasabbut nalilibut sin panyap “information technology” pagbahasahun nila. Duun da isab nakabutang in kaupis-upisan taga darajat dunya. MashaAllah, bukun hat manara mataas bat nagdara pa sin kaupis-upisan darajat mataas. Bang kau ha taas diyurumulan mu biya' sanam sibi'-sibi' in tau ha baba', sakaula-ula in taas sin darajat mu miyamagad ha manara nasabbut.



Simunu' in tasdik sin atay ku bang biyadiin na baha' in baba' sin tau way ilmu' ha manga sila matakabbul, mataas in pangatud ha baran nila? Labina in tau way gawd gagas sa' mataas pa in pangatud nila ha baran nila!

Ha pangatud sin Tuhan way mataas iban mababa', sumagawa' nakabidda' in darajat sin ilmawan ha mata sin manusiya' iban Tuhan bang kiyapagguna in ilmu' nila, iban ha way piyagtakabbul iban piyangakkal pa pagkahi.

Wahay taymanghud ku, nakahangad dabaha' kau biya' sin kiyahangaran nila? Nakadumul da baha' kau biya' sin sila amun nakasakat pa puntuk manara?

Ilmu' dunya atawa ahirat in mahalga' kiyapagguna. Sumagawa' in makalamma, bang wayruun anawun ilmu' misan hangtingi'.

Manga maas namu' kalasahan, duuna ka awn ilmu' iban way in mahalga' magaddat iyaddati kita niyu, iban magtuyu'-tuyu' kita niyu magpatuntut ilmu dunya ahirat ha manga kaanakan natu'. Hasupaya misan dakuman makaurul-urul pa duwa pangkat sin manara iban palabi, In mahalga' didtu makarumul na sila sin pa baba’ sin manara. In baba' sin manara, awn lunghag niya maluag sarta' tigidlum bitu-bituhan, way anawun mata suga.


Altaufik

0 comments: