Aha, sa’bu hi Abunnawas didtu ha tabu’ nagsara’ nakaratung isab pa astana’ in anak sin Sultan. Pagdatung sin anak sa’bu nala’day hi Ayah niya iban sin karatuan. Hawpuun ta nakasayu na in Sultan iban sin manga karatuan niya. Imusisa’ na ruun in anak bang unu in jimatu, duunan ta na namayta’ na in Sultan sin hinang hi Abunnawas. Ubus man namayta’ in Sultan diyugalan in anak, sung niya kadtuun hi Abunnawas pa bay binasahun. Daypara di’ mabaya’ in Sultan karna’ sin nakajanji’ sila kan Abunnawas di unu-unuhun. Laung sin anak,
Maraw na Ayah, pagga’ bihadtu way mahinang ta, bihaun ha supaya kita makabaus yari awn diyara ku manga ilmawan hipara ta kanila ini magsual jawab hi Abunnawas. Bang ha tatkala’ hi Abunnawas diyaug ha pagsual jawab ini ampa natu’ siya hukumun sin matup kaniya.
Kiyaamuhan in Sultan iban sin manga karatuan. Pagkakunsuman kiyadtu na sin Anak Sultan hi Abunnawas pa bay biyaytaan sin hal yadtu. Hawpuun tana miyagad na hi Abunnawas pa Astana’. Pagdatung hadja hi Abunnawas timagna’ magtuy in pagsual jawab. In hinang hi Abunnawas magjawab hadja sin susualan kaniya. Timagna na simual in hambuuk ilmawan.
1 ilmawan:
Abunnawas, bang ikaw hawnu mataud in bituun ha langit iban sin ista’ ha dagat?
Abunnawas:
Maluhay ra bang bihan in pangasubu mu. Tantu mataud in Ista’ ha laud daing sin bituun ha langit.
1 Ilmawan:
Kadtui kunu’ salassaya.
Abunnawas:
Misan bihan in taud sin bituun ha langit, sumagawa’ in sila di’ magtaud, tattap hadja in taud nila, bukun biya’ sin ista’ awn mapatay awn da isab hipaganak. Ha bistahan mu bang in ista’ ha jaman sin Nabi Adam piyun katan iban sin bihaun maunu taud ista’ in kakitaan mu?
Way nakakayba’ in hambuuk ilmawan tahan nanaug daing ha palalihan iban paganduk. Nasusa in anak Sultan iban sin Ayah niya. Sumagawa’ waypa nangaku daug in anak Sultan karna awn pa hambuuk ilmawan nakapin. Timagna’ da magtuy in sumunud sual jawab.
Nangasubu na in hikaruwa ilmawan kan Abunnawas:
Abunnawas, bang kaw bunnal maingat, (imaatud in ilmawan pa manuk ha pugaran iban iklug ha guwa sin pugad) hawnu in nakauna piyaawn manuk atawa iklug?
Way katukin-tukin siyambut magtuy hi Abunnawas in pangasubu:
Bang bihan da in pangasubu maluhay jawaban, laung hi Abunnawas. Tantu in nakauna piyaawn amuna in inah manuk yan.
2 Ilmawan:
Salassaya kunu’ kamu!
Abunnawas:
Bihaun pakitaun takaw,
(miyadtu hi Abunnawas pa inah manuk ampa niya piyaguwa’ in inah manuk daing ha pugad iban inig niya in iklug sin manuk yadtu daing ha laum pugad)
Bihaun laung hi Abunnawas kitaa bang hisiyu in himibal kanila manuk atawa iklug? Tantu in kiyasaksian niyu naghibal amuna in inah manuk timudju madtu pa iklug niya. Daing ha sabab in siya nakauna daing ha iklug piyaawn kakilahan niya in iklug niya, hangkan na siya miyanaw madtu. Ampa in iklug tantu di makakila iban makahibal pasalan in siya ha ulihan na piyaawn.
Way nahinang sin ilmawan magtuy ra nangaku raug. Ha kahawpuan niya dimaug hi Abunnawas ampa siya minuwi’ pa bay niya iban sin pagkug kuyag nagdara sin haddiya daing ha Sultan.
Pagkakunsuman, na aburidu in anak sin Sultan in hinang niya miyadtu siya pa bay hi Abunnawas iban pagda niya manga tindug mataud iban hambuuk agasi. Kailu waypaghantang tindug pagdatung nila hadja pa bay hi Abunnawas magtuy piyalubu sin anak Sultan in bay hi Abunnawas ha agasi. Hangkaraih da jiyabjaban sin agasi nahansul in bay hi Abunnawas.
Limandu’ in susa hi Abunnawas karna’ wayruun mahinang niya daing sin magkarukkaan dakuman. Kiyaingatan niya misan siya umatu wayra mahinang niya gamman magmula na in kabuhi niya. In hinang niya limingkud siya ha takas bay niya. Hangkaraih paman lugay niya hapaglingkuran awn na tuud hambuuk langaw magdagit ha u niya. In langaw yadtu isab biya’ passut , sambil in langaw yadtu, ha masa tiyu-tiyu’, nakapaghiyatihi kay Abunnawas. Unu unu in hibal sin lima hi Abunnawas agarun niya. Lugay niya hapaglangugan iban langaw nakabaak siya pikilan sin hinangun niya ha Sultan.
Magtuy ra siya nagmumus ampa siya miyadtu pa astana’ sin Sultan iban langaw miyamagad kaniya. Pagdatung pa astana imalup siya pa Sultan ampa namayta’ sin hajat niya.
Abunnawas:
Misan ampun liyubu sin anak mu in bay ku wayra yadtu halga’ kaku’ amuhadja bihaun yari aku miyari iban pagmalilla’ magpasumbayi’. Sumagawa’ awn sarat niya, mangaku aku sumbayiun bang niyu masaggaw in langaw ini. Bang niyu di masaggaw in langaw ini in aku di’ niyu masumbayi iban unu unu in magmula ha laum bay ini bukun tannggungjawab ku.
Laung sin Sultan:
Maraw na bang hat da bihadtu in pangayu’ mu misan kaw tumanam na asal, paminmin nakaw, adlaw ini na in ajal mu.
Iyuyum hadja hi Abunnawas salta’ miyumuga’ da isab.
Ubus man simuna in Sultan biyutanan na hi Abunnawas in langaw. Unupakaw in Sultan iban sin panindug niya nagsama-sama na simaggaw ha langaw. Sumagawa’ ha bihadtu taud nila simaggaw way sila nakasaggaw karna’ sin miyamagad ha lima hi Abunnawas in hibal sin langaw. Napulakkanat na in panyap ha laum astana’ sin Sultan. Nagkabagbag na in manga suku’ sin mabagbag nagkapunung na in nagkapunung adapun wayra sila nagmumpaat simaggaw ha langaw. Diyugalan man in Sultan tiyawag niya in agta’ kiyukural iban pagda panyap hipaglulubu. Duun man in agta’ nagsasaggaw ha langaw nakakugdan na in panyap hipaglulubu yadtu pa hag kalagguan sin astana’. Daing ha sabab in agta’ limandu’ dugal wayruun na makalang sambil in astana’ sin Sultan nalubu, adapun in langaw wayra nasaggaw nila katan. Hiyundungan hadja hi Abunnawas subay nalubu in astana’. Paglubu sin astana’ ampa siya timudju pa hambuuk hula’.
0 comments: