Manga kitab Mawlid

Ha jaman natu' bihaun kulang na in daing ha lungbu' ba'gu in makaingat ha kakahinang sin kamaasan natu'. In manga parsababan jimatu ini karna' sin kimusug in pag-iskul (Western Education) ha hula'. Daing ha sabab sin kimusug in pagiskul in pagpangadji' agama agad di' na maalup sin kamatauran. Karna' ha pangatud sin kaibanan in pagpangadji agama di' makadihil kakayaan dunya. Misan in kaawnan sin kaibanan makapangadji' ha panagnaan adapun bang magpasung na pa taasan didtu na in kamatauran mi' pa Western Education. Daing ha sabab in pagpangadji Madrasah luwal hadja agama iban wayruun da kahinangan paghuwas nila mangadji'. Bunnal baha'? In hal ini mahaba' bang bissarahun, hisulat taman hambuuk adlaw in tungud pa hal ini, insyaAllah.

Bakas kamu nakakita' kitab Mawlud? Unu awn baha' kapaiddahan sin kitab ini pa ummat Islam ha Sulu? 

Tantu manga taymanghud in kitab mawlud ini malaggu' in kapaiddahan labi awla hapagpatubu' sin lasa pa Rasulullah SAW. Hambuuk daing ha manga kitab Mawlud amuna in kitab Barzanji. In luun sin kitab ini manga duwaa, pupudjian iban riwayat kabuhi' sin junjungan Rasulullah SAW. In kaagi pagbassa sin kitab ini iyaagaran madtu lugu' biya' sin kabiyaksahan pagkadungugan bang maggunting ha bata'-bata'. Hangkan da tuwi' bang ha hula' in pagmawlud iyaagaran paglugu'. 

In kitab barzanji nakawa' daing ha ngan sin nagsulat kaniya, Syekh Ja'far al-Barzanji bin Husin bin Abdul Karim. In hamba Allah ini piyaganak ha Madinah ha tahun 1690 sambil nawapat ha tahun 1766. In awal hi Barzanji daing ha hambuuk hula' pagnganan Barzinj, Kurdistan. 

Bang ha hula Indonesia, in pagbassa sin kitab mawlid agad tiyap tiyap hangka pitu. Sumagawa' magkukusug in paghinang nila bang ha bulan Rabiul Awwal, bulan kapaganak ha Rasulullah SAW. Amura kuman awn da isab piyagbiddaan sin pagsambut nila iban sin pagsambut sin bangsa ta, in piyagbiddaan yadtu luwal da duun ha addat bihasa' (culture) adapun bang ha babassahun sibu' da. 

Hambuuk pa daing ha Kitab Mawlud tanug biya' na sin Simtud Durar. In kitab ini hambuuk pupudjian ha junjungan Rasulullah SAW salta' na iban manga duwaa ha laum niya. In naghatul sin kitab ini hi Habib Ali bin Muhammad bin Hussain al-Habsyi, (1259H - 1333H/1839M - 1913M). In hamba Allah ini hambuuk daing ha manga ulama' tanyag ha jaman niya. In siya ini hambuuk ulama sin Ahlul Bait (Ahlu Sunnah Wal jamaah) amun gimagayunggung ha baugbug sin Nabi Muhammad SAW. Bang kamu mabaya' humati sin kabuhi' nila ini yanda mataud kabaakan ha web halaman. 

Laung sin hambuuk imam Tausug in kitab Simtud Durar ini nakaabut da isab pa hula' ta ha jaman nakauna. Bima'na in sahaya sin ilmu' biyaktul sin manga ulama' nasabut ha laum ini asal malugay na dimatung pa hula' ta. Hangkan da tuwi' in kamaasan misan pa liyagi' lagi' sin pangadji ba'gu bihaun luwal umuyum hadja, asal kiyaingatan nila in manga ilmu' nagkatuntut nila ilmu' sin Junjungan nabi Muhammad SAW.

Hangkan kalagihan natu' buhiun in pagjunjung ha Rasul SAW bang awn dapat bukun hangka tahun makaminsan. Asal da in tungud ha hal ini ubus na piyasasawa sin manga ulama' Ahlu Sunnah Wal jamaah in makajari siya hinangun apabila di' da makadugtul sin manga piyanglangan sin Islam. 

Ha jaman ini, kalagihan subay buhiun ha laum pangatayan sin tiyap tiyap kaanakan sin bangsa Muslimin ha Sulu in paglasa ha Rasulullah SAW. Sabab yanna in indajinis panglaung jimajatu ha katilibut amun mahinang sabab hikatabun sin lasa nila pa panghu' sin katan Manusiya'. In paglasa ha Rasulullah mahinang siya palitaan masawa ha laum pangatayan sin tiyap tiyap bangsa Muslimin.

Allahumma salli ala sayyidina Wa Habibina, wa syafiena, wa zuhrina, wa mawlana Muhammad sallallahu Alayhi Wasallam.