Kakilahan niyu in pagnganan Tuan Muda’? Marai’ ha manga lungbu’ ba’gu bihaun kulang na in makakila kaniya. Sumagawa’ ha manga kamaasan nakauna ha hula’ in ngan Tuan Muda’ landu’ tuud in hamut iban katanug.
Hi Allahyarham Tuan Guru Hadji Ghulam Hassan Limahil pa dunya ha tahun 1920, ha lungan Dara Hazarah, Pakistan. In tau ini wayruun nahuwat sin katan ha hula’ niya mahinang hambuuk Wali Allah sin ahil jaman. Daing pa ha ummul pitu tahun asal awn na kasipat sipatan niya amun tanda’ sin pagkazuhud niya. Biya’ na sin magkahagad ha bayta’ sin maas, di’ kumaun sin bukun alta’ niya, masub magpuasa sunnat sambil matagi magbassa Qur’an. Ha waktu bulan Ramadan, wayruun hambuuk adlaw katinggalan niya magpuasa. In katan bata’ bang adlaw haylaya magkugkuyag, ampa in siya gamman magtangis karna’ sin lasa niya ha bulan Ramadhan. Ha hinapusan biyugtu’ niya ha atay in magpuasa siya adlaw-adlaw ha lugay 30 tahun.
In guru ini daing pa hakasibi’-sibi’ naanad na siya magsambahayang barjamaah ha Masjid. In tanda’ sin suwak niya misan nasakit na tumuyu’ da madtu. Hi Tuan muda’ bukun biya’ sin kabataan kaibanan, in waktu niya dum iban adlaw nausal hapagjikir iban pagsambahayang sunnat. Pagabut sin ummul niya walu tahun magsusung na in kusug sin pagibadat niya. In hinang niya magi’tikap haka masjid masjiran. Ha pagi’tikap ini piyagbak niya na in manga maas maas amun kubalan na hapagibadatan. Awn hambuuk alim piyagbak niya wayruun dugaing hinang daing sin magi’tikap. Ha laum sin hangka tahun 5 adlaw ra in buka’ niya. Ha kahawpuan niya nakapagkhidmat siya ha alim yadtu, sambil hi Tuan Muda’ tiyagihan miyagad nag’itikap ha alim yadtu.
Nagsabab daing ha daran siya naligap sabab sin mataud makakila kaniya, nakapikil siya minda hulaan amun kulang in makakila kaniya ha supaya di’ na siya mahidjul bang magibadat. Daing na ha sabab yadtu, nakaabut siya pa Borneo (Sabah). Nagsabtan isab ha waktu yadtu awn tau ha hula’ niya lamud ha sundalu sin British timibaw pa hula’. Nagbalik man in sundalu yadtu pa Borneo miyagad na siya. In ummul niya hapagtulak yadtu 18 tahun, kimugdan ha tahun 1938.
In hula’ diyatungan niya amuna in Lahad Datu. Pagdatung niya pa Lahad Datu, limaus siya pa Tawau nanglawag kabuhianan. In paglawag niya usaha bukun samata mata umapas sin kakayaan dunya adapun bangman awn hipami makaun. In sipat sin guru ini ha waktu siya naghihinang piyapatayimbabaw niya ra in hinang marayaw. Malasa siya ha manga maghihinang ha babaan niya, sambil pa bata’-bata’ in pagda niya biya’ da tau maas. Ha waktu siya nagda hinang in gadji sin tau maas hangpu’ taglima in gadji sin bata-bata 15.00 ra isab. Sabab misan bata’-bata’ ha pangatud niya sibu’ sibu’ da isab in kabinsanaan.
Hambuuk pa tabi’at sin guru ini bang hapaghinangan di’ niya palabihun in hinang dain sin pagsambahayang. Umatas siya mig daing ha hinang bang siya di’ pasambahayangun. Bukun hadja sambahayang fardu’ in hiyalgaan niya sampay pa sunnat duha. Hambuuk adlaw limugay man siya naghinang ha Tawau giyanapan in taud sin hinang niya. Daing ha sabab in hinang giyanap yadtu hikahundung niya magsambahayang sunnat duha, wayruun niya tiyayma’. Gamman di’ man sila magsulut minig in guru daing hapaghinangan ampa nagbalik pa Lahad Datu’.
Amuini in manga maniyu’tiyu’ pagkazuhud sin hambuuk kakasi sin Allah.
Pagabut ha tahun 1959, awn dimatung Tausug pa Lahad Datu nagtaabbit ha tuan guru paagarun pa Sug. Ha kahawpuan niya miyagad siya madtu nagpasampay sahaya sin Islam pa Tausug. Mataud manga nahinang sin tuan guru ha jaman sin pagkadtu niya pa Sug. In matampal suysuy pagkadugungan ha waktu pagkadtu niya pa Sug, biya’ na sin mataud in nagbak kaniya, mataud in nakasayu ha agama, sambil awn manga karamat piyagkasakupan sin bangsa sug ha tuan guru ini. Hambuuk daing ha manga karamat kiyasuysuy biya’ na sin bayta’, hambuuk adlaw kiyunsian in tuan guru ha laum bilik, hatiku baha’ nanukas in kiyaratungan niya. Pagkita’ sin nagkunsi’ kaniya in tuan guru yadtu ra ha masjid simasambahayang. La Hawla wala Quwata Illa Billah.
Mataud pa manga karamat kiyasuysuy sin manga murid palihalan sin tuan guru. Adapun ha kahawpuan niya, hi Tuan guru Muda’ hambuuk manusiya’ amun awn tumtumun sin bangsa Sug. Misan siya bangsa Pakistan in kiyada’wahan niya agad bangsa Sug katan. In naggulal ha Tuan Guru, “Tuan Muda’” amuna in manga bangsa Sug. Karna’ in pamayhuan sin Guru yadtu bang aturun bata’ ba’gu, misan malaas na.
In tuan guru ini mataud murid niya ha Sabah, sambil na pa kapuan Sug. In sipat piyakikita’ sin tuan guru ini amuna in kasilasa pa mahluk sin Allah SWT.
--------------------------------------------------------------------------
Sugpatan man in Suysuy bang awn pa ijin daing ha Allah SWT.
In katan bayta’ ha laum ini nakawa’ daing ha Manaqib niya.
0 comments: