In Lupa’ Sug iban Sabah ha jaman nakauna tanug pagdaratungan sin manga Ahlul Bait daing ha hula’ Yemen iban sin kaibanan pa hula’ Arab. Ba’gu ba’gu ini awn hambuuk bagay ha Sandakan nakauki marayaw sin hambuuk Guru dakula’ amun malaggu’ in natabang niya hapagpasaplag sin Islam ha partangngahan sin tahun 1900. Bunnal niya bang bukun daing ha tuyu’ magbungkal sin manga nakatapuk, mahunit na lagun in manga nusulan sin nagkalimun lawa’.
In guru ini in ngan niya hi Syeikh Hasbullah At-Thahiri. In maas sin guru ini in awal daing ha hula Aden, Yaman. In ama’ niya hambuuk maguusaha iban magdada’wah. In diyatungan niya hula ha likusantara amuna in Johor, ampa timudju pa Sug, ampa piya Sandakan. In Ama’ niya ini, hi Syeikh Said Bin Ali At-Thahiri, nakaasawa Tausug naghuhula’ ha Sandakan.
Hi Syeikh Hasbullah At-Thahiri hambuuk dugu’ sug bar-ilmu’. Ha tahun 1913 in syeikh ini nakapangadji ha Madrasa Al- Attas Al Arabiah Al Islamiah ha Johor. Nakatalus man nangadji didtu nanghindu’ siya ha Madrasah Al Sagof Al-Arabiah, Singgapura ha tahun 1924. Pagubus daindidtu piya Sug siya nagpasaplag sin kallam sin Allah pa manga Bangsa Sug.
Ha Sandakan in Syeikh ini nagpapanaw sin pagda’wah ha Masjid Jami’ ha laum daira. Nagsabab daing ha tuyu’ niya in Islam ha Sandakan kimusug iban in Masjid Jami’ nahinang pusud pagpangadjian ha Sandakan. Awn bayta’ ha jaman ini sambil manga tau daing ha Lupa’ Sug magpakaratung pa masjid ini mamusu’ ilmu ha Syeikh. In daran hihinang sin Syeikh ini ha Masjid Jami’ biya’ na sin Magmawlud, Magtahlil, Magduwaa, Magnasihat iban maghindu’ ha manga tau pasal sin Fardu’ ‘ain iban Fardu’ Kifaya. Sambil ha jaman yadtu naparayaw niya in parsugpatan sin manga Muslimin ha Sandakan.
In ngan sin Masjid jami ha daira Sandakan, amun ha taas bud, piyagsangay kaniya.
Yari in hambuuk daing ha manga bunga lima sin Syeikh kiyabaakan labay ha pagasubu ha manga asu kampung sin syeikh amun masi yari bihaun ha Sandakan.
In katan bayta’ pasal sin Syeikh ini nakawa’ daing ha http://khalifahsuluk.blogspot.com .
0 comments: