Kaja: Ma'siat atawa Ibadat



Bismillahirrahmanirrahim

Alhamdulillahi Rabbil alameen wassalatu wassalamu ala asrafil anbiyai walmursalin Sayyidina Muhammadin wa ala alihi wa ashabihi ajmain.

Sulayan natu’ hidukut ha laum ini in adat sin kamaasan natu’. In kiyasulat ha laum ini bukun bilang pandapat sin hambuuk guru sagawa’ daing ha pikilan sin hambuuk murid amun awn kiyatilagan kasabunnalan ha hinang sin manga nagpangIslam nakauna ha kapuan Sug.

In Kaja sambil pa adlaw ini wala’ kitaniyu nakadungug sin tupan maana niya misan pa awn gimuwa’ gaydpamikil bahawa in Kaja nakawa’ daing ha kabtangan “KERJA” atawa hinang. Bang ta hi agsu’ pa salsilah sin kamaasan ha tungud pagKaja in kabtangan Kerja magtuy ra mapapas kandiriniya bang hakiraniya kaingatan natu’ in puun sabab sin pagkaja. Laung sin hambuuk bayta’ in puunan sin Kaja daing pa ha jaman sin Apu’ Adam ha waktu didtu pa siya ha laum sulga’. Misan dumagbus kata-kata sagawa’ in parakala’ ini maghajat sayiksikun pakalauman niya. Karna’ di’ maawn in bissara bang wayruun giyuwaan niya. Di’ natu’ da isab manjari taliun bahawa in hinang ini daing ha agama Buddha sabab in pikilan ini masamlang iban sin hipagpaguwa’ sin kamaasan bahawa in Kaja amuna in sukat ungsud sin Apu’ Tuan Sharif Mahadum RA ha anak niya babai ha waktu nakapaghula’. In pangasubu mayta’ nagsukat in Apu Mahadum bihadtu ha anak niya? Unu bukun baha’ ini asal kabiyaksahan paghinangun sin sila ha hula’ nila? Atawa bukun da baha’ in hinang ini kabiyaksahan paghinangun sin kanabihan? 

Adapun in paghinang sin Kaja mataud jinisan niya. Awn magiyan subay 11 manuk iban sin manga kaibanan kapanyapan kalalagihan hapagduwaa. Awn da isab magiyan hambuuk manuk jukupna hipaghinang ha masa pagkawin. Di’ na kita magtagid-id sin hal pagparagbus sin pagkaja sagawa’ in kitaun natu, unu baha’ in hinang ini makasud kasiya pa tiranan sin Ibadat atawa mahinang sabab hikapagma’siat.

Syeikh Dr. Tahirul Qadri
Ha hal ini subay natu’ pahamun in panakupi sin sara’ ha Islam pa adat sin tiyap ummat hakatilingkal dunya. Ha jaman nakauna in adat iban sin agama hangkaliyupian. Misan isab bihadtu wala’ nagmaksuri in adat amuna in nanudlui atawakan agaran sin Islam. Sabab in agama Islam amuna in agama partangngahan tupun ha katan waktu iban kahalan. In adat nahinang hadja siya parantara’ hikapasaplag iban hikakusug sin pagagama sin bangsa Muslimin ha jaman niya. Adapun in adat amun asal sulang daing ha lahil pa batin asal di’ makasud ha agama. Suntu’ niya awn manga adat sin bangsa ta biya’ na sin magtaun wahuy, magtakbi’ iban sin kaibanan pa amun wala’ liyamuran sin pag-agama karna’ in manga hal ini asal matampal ma’siat. Adapun in Islam nana’gahi sa tugas-tugas niya ha manga hinang ma’siat.

In Adat pagbahasahun amuna in kakahinang natayma’ sin tau ha hambuuk hula’ atawa ha hambuuk jaman sibu’ da in kaawnan niya mangi’ iban marayaw. Suntu’ niya ha bihaun in adat kiyaupihan sin katan bangsa manusiya’ biya’ na sin pag”internet”. Adapun in paginternet makajari siya pasuran pagibadat damikkiyan makajari ra isab siya pasuran pagma’siat. Bang in hinang mu hapag”internet” magsuysuy sin agama atawa mangdahi ha manusiya’ magiman pa Allah in manga yadtu makira pagibadat damikkiyan bang usalun hipaghinang sin langgal sara’ tantu mangdahi ra siya papagma’siat.
Habib Munzir Al-Musawa
In pagkaja bang ta pasurun ha paham sara’ biyaktul sin kaulamaan nakauna duun ta siya mapasud ha hinang “Tawassul” [Umusal Parantara’ ha pagduwaa] iban “Istigatha” [Mangayu’ ha mahluk buhi’ iban patay]. Misan bukun sibu’ in dagbus sin hinang adapun in susugsugan ha laum pagkaja mataud tawassul iban istigatha. In duwa hinang ini jiyari sin manga ulama’ daing ha upat Majhab. Ha masa natu’ ini in tanug ulama nanindugi sin PagTawassul iban PagIstigatha biya’ na kan Syeikh Dr. Tahirul Qadri iban sin tanug magdada’wa ha Indonesia biya’ na kan Habib Munzir Al-Musawa. Ha Kitab siyulat hi Habib Munzir “Kenalilah Akidahmu” awn hambuuk farman piyaguwa’ niya ha gikapan 33 manunjuki ha pagTawassul:

Nagfarman in Allah SWT: “Wahai manga bar-iman, pagTaqwa kamu/pagtaat kamu pa Allah SWT iban lawag kamu par-antara’ amun makapasuuk kaniyu pa Allah SWT iban pagluaslungsad kamu ha dan sin Allah SWT, ha supaya kamu makakawa’ paluntungan” [QS. Al-Maidah-35] 
Urula niyu ra kuman in panapsil niya ha ayat ini. 

Adapun in ha tungud Istigatha namung hi Habib Munzir “Ha waktu in hambuuk tau mamung bahawa in tau patay di’ makadihil mumpaat iban in tau buhi’ amun makadihil mumpaat, in siya awn bulirapat mahulug pa laum kakupulan karna’ tiyayma’ niya in kabuhi’ amuna in puunan sin mumpaat adapun in kamatay amuna in mustahil makadihil mumpaat. Parahal in mumpaat iban mudarat daing ha Allah SWT. Adapun in kakawasahan sin Allah SWT di’ katampanan sibu’ da kabuhi’ iban kamatay. [Kenalilah Akidahmu, gikap 37]

Ha dalam sin bihadtu mataud hadis piyaguwa’ niya ha tungud pangjarihi sin Nabi Muhammad SAW hapagistigatha. Biya’ na sin hambuuk hadis nasabbut ha baba’ ini:

Kiyariwayat bahawa ha unahan sin Ibn Abbas RA awn hambuuk simakit in siki [hantang bula-bula] niya, ampa namung kaniya in Ibn Abbas: “Sabbuta in ngan sin tau amun landu’ tuud kalasahan mu...!” Ampa simabbut in tau yadtu iban suara matugas...: “Muhammad!, daing ha sabab yadtu hangkaraih paman imuli in sakit sin siki niya. [Riwayat hi Imam Hakim, Ibn Sunniy iban riwayat da isab hi Imam Tabrani iban sanad niya hasan] iban in riwayat ini piyagriwayat da isab hi Imam Nawawi ha Al Adzkar.

Ha dalam sin bihadtu in tiyap-tiyap magduruwaa Kaja iban magpangayu’ hakatampat-tampatan subay di’ magduwa ruwa sin hinang nila. Karna’ bang in hinang sin kamaasan laung tantu ha jaman nakauna pa mapu’pu’ na in hinang ini. Amura kuman in kalagihan sin manga bangsa Tausug parayawaun in pag-i’tikad ha supaya di’ isab mahulug pa laum kasirikan in hinang nila. Subay maayad ha pagi’tikad iban ha parniyatan karna’ in makasah sin katan tuput tunggal Tuhan. Adapun bang in ha laum i’tikad bat in makapauli amun Apu’ kiyatampat bukun amun Tuhan tantu awn pagduwa-ruwa makadugtul da isab ini ha dusa salaggu’-laggu’.

Hangkan na in adat sin Bangsa Tausug nabuhi’ in pag-Imam atawa pag-pakil. Sabab amun manga Imam ini in maghinang sin pagduwaa. Adapun di’ da isab manjari taymaun hinangun Imam in hambuuk tau apabila bukun pantuk ha hinang nila.

Biya’ na sin sambat in unu-unu katan Tuhan da in makahukum. Di’ natu’ na awnun in pagarujawab ha tungud ini, adapun in mama’tali ha hinang binin katu’ taniyu sin kamaasan subay di’ natu’ magtuy dihilan hukuman sabab ayaw paka in mahukum natu’ in hinang amun wala’ natu’ na kiyasakupan in puun sabab niya buat malaingkan misan hinang natu’ kandi mahunit natu’ da hukumun bang tiyayma’ ka iban sin wala’.

Hambuuk da in patarrangan namu’ daindi in kakahinang sin kamaasan naurul sin pamandu’ daing ha bautan sin Islam labay hapagluku’ ligad sin manga kaulamaan nagpakaratung pa hula’ iban sin asal na ha laum hula’ amun pantuk hapag-agama.

In katan piyagbiddaan pandapat atawakan pamaham ha katampalan sin pagagama bihaun nagsabab daing ha nusulan sin jaman. In paggingung ha bihaun sabab daing ha nakauna. In Islam bukun ampa kahapun dimatung pa Kapuan Sug damikkiyan bukun ampa adlaw yan in tau Lupa’ Sug nakaingat sin pagtawhid sabunnal. Amura in wala’ nakapaham marayaw in wala’ hidayatan sin Tuhan pahatihun sin ilmu’ niya yaun mimikit ha utuk puti’ sin manga kamaasan.

Dungdungan natu’ in papata si kamaasan “Ha susungun di’ na masilang in hadji iban bukun  hadji’ karna’ tumaud na in magsusulban puti’”

Magpahugut na hadja kitaniyu sin panindug pakaniya-pakaniya in katan mapun da ha hadarat sin Allah SWT tumayma’ sin hukuman sabunnal-bunnal. Bang awn kalaungan pagmaapan dakuman, mikiampun aku pa Allah SWT ha manga karayawan iban kalaungan ha laum siyulat sin iypun Niya hina’ ini.

Bang kamu mabaya' lumawag sin kitab sin Habib Munzir paglawag hadja kamu ha Google

0 comments: