Pamaratsaya Iban Kakahinang

Bismillahirrahmanirrahim.

Salawat Iban salam pa Junjungan Rasulullah SAW, pa manga taulaum bay niya pa manga sahabat niya iban pa manga kakasi niya.

Alhamdulillah, yari pa kitaniyu ha babaw gumi imuusaha sin mahinang natu' lutu' dahun pa hadarat sin Allah SWT. In katan ha dunya ini tantu mahansul da, wayruun da mahinang batu hangsulag unu-unu mapuas daing ha Jat sin Allah SWT. Adapun in sarayaw-rayaw lutu' dahun magbalik pa Tuhan amuna in Iman iban Taqwa. In hantang sin Iman pagbahasahun bukun paratsayahun hadja sin dila' sagawa' amun pamaratsaya mara sambil in katan anggawta' sumaksi' ha Katunggal sin Mahasutsi Allah. In pamaratsaya bihaini amuna in dagbus bawgbug sin manga sila Mu'min, manga Kakasi sin Allah SWT. In Taqwa amuna in kakahinang amun hadil in Tuhan ha unu-unu pakaradjaan. In kahadil sin Tuhan hakatan kakahinang bukun nagmaksuri bat duun Siya sagawa' in katan sakup sin Ilmu', Qudrat iban Iradat Niya amun yaun kiyatangkil Niya ha kasku sin manusiya'.

Lugay di ha dunya fana ini in manusiya' duun da magligut-ligut ha pamaratsaya iban kakahinang. Duun naka in siya hambuuk way kakaingat atawa tau amun naggugulal maingat duun da siya magtuyu' ha pamaratsaya niya amun in katan kakahinang niya duun sumaha'.

Awn manusiya' namaratsaya in Tuhan laung na mataud, awn Tuhan nagjajaga sin langit, awn Tuhan nagjajaga sin Lupa' iban sin kaibanan pa. Ha bihaini dagbus sin pamaratsaya niya in katan kakahinang niya manunjuki ra madtu pa pangagahari mataud in Tuhan. Bang siya mangayu' Ulan madtu siya tumudju pa Tuhan sin Langit. Sambil in kaawnan kadihilan niya had in kawasa sin Allah SWT amun Tagdapu sin katan Alam iban sin luun niya.

Awn da isab namaratsaya in Nabi Isa Alayhissalam laung na Anak sin Tuhan. In kaawnan nila sumumba kan Nabi Isa bilang Tuhan, paghuwas in katan sin kakahinang sumaha' da isab daing hadtu. Himinang sila barhala' paragbusun kan Nabi Isa Alayhissalam ampa nila sumbahun.

Adapun in Allah SWT malayu' daing ha manga yadtu. Karna' in Allah SWT wayruun sama-sibu' niya iban wayruun makatugila' sin Jat niya. Laung sin Allah SWT ha laum Qur'an:

"Say: He is Allah, the One and Only! Allah, the Eternal, Absolute;  He begetteth not nor is He begotten. And there is none like unto Him. Translation Yusuf Ali (Surah Al-Ikhlas)"

                           

Daing ha sabab yan, pagtagama kaw tuud sin pamaratsaya amun tubus salta' malayu daing hapagduwa-ruwa karna' in katan manusiya' tantu muwi pa  hadarat sin Allah SWT. Tagama kaw sin panagnaan pangasubu sin Mungkar iban Nakir ha laum Kubur. Di' dakaw asubuhun sin Mungkar pila in taud sin degree mu atawa biyadiin in ingat mu ha English grammar. Di' dakaw asubuhun sin mungkar pila in gadji mu hangka bulan atawa taud sin alta' mu. Di' dakaw asubuhun sin mungkar biyadiin in lingkat sin bay mu. Sagawa' in asubuhun kaymu muna-muna: HISIYU IN TUHAN MU? Kaingatan mura baha' in sasambungan? Napasti' na baha' sin atay mu in Tuhan mu Allah SWT? Kiyasaksian na baha' sin tibuukan ginhawa mu? Bang waypa. Pag-us-us kaw ha waktu in kamatay waypa dimatung katu'. Ampa tantu magdaratung datung da siya duma katu' magbalik pa hukuman sin Tuhan Rabbul Alamin.

Bangman kitaniyu iyampun sin Allah SWT katantan iban pasaksiun Niya kitaniyu sin Katunggal Niya biya' sin panaksii sin katan Kanabihan, Kawalihan iban manga ulama' Haq.