Paghuwat-huwat


In manusiya daing haka tihabaan jaman ha laum  hadja sin paghuwat-huwat. Awn na  in maghuwat-huwat pa marayaw, awn da isab in maghuwat-huwat pa mangi'. Suntu' niya in hambuuk tau ha laum sin kasigpitan lagi wayruun pagusaha. Ha bihadtu kahalan maawn na didtu kaniya in paghuwat-huwat  ha asu kampung niya, ha kaanakan niya iban ha unu-unu in awn duun kaniya. In huwat-huwat niya kalu in asu kampung, in kaanakan in unu-unu na ruun kaniya makasalassay sin kasusahan niya. Damikkiyan awn isab yan tau ha laum siya sin kasusahan amun nagdanan daing ha hambuuk tau atawa hambuuk tumpukan in kabuhi' niya nagkangi'-ngi'. Nagsabab daing ha manga kakahinang sin nanganyaya kaniya yaun wala' siya imuntayaw. Ha bihaini kahalan naghuwat-huwat in atay niya bangman in manga nanghina' kaniya yaun puddahun da in kabuhi' nila ha dunya atawa magkangi'-ngi' da isab biya' kaniya.

Bihan na in manga suntu' amun magjatu ha manusiya'. Adapun di' ta kakitaan didtu in putti sin paghuwat-huwat pagnganan. Bunnal yadtu in paghuwat-huwat jimatu kanila, sagawa' wala' didtu in putti niya. In putti sin paghuwat-huwat subay ra hitukbal pa Tagdapu sin katan alam iban sin luun niya. In manga sila bar-iman iban mu'min, in atay nila nangamdus ha paghuwat-huwat pa Allah SWT. Karna' kiyapahaman sin sila Tuhan da in matup huwat-huwatun. Karna' in katan piyapanjari manahut-maaslag hangad-hulat pa tatabangan sin Mahasutsi Allah. In dagbus sin paghuwat-huwat sin manga Muslim bukun biya' paghuwat-huwat hi Juan Tamad misan yaun na in bungang kahuy ha simud niya malisu' da siya misan in musu'. In panghindu' sin Ahlu Sunnah Wal Jamaah pa manga ummat Muslimin subay in katan paghuwat-huwat agaran sin lugtu' iban pagtuyu'. Adapun in paglugtu' iban pagtuyu' bukun nagmaksuri amun makaparatung sin hiyuwat-huwat adapun in yadtu sabab hadja pa hikaratung sin tatabangan sin Tuhan. "Iban dihilan namu' sila pa katan dan (sabab)" (Al-kahfi:84)Adapun in kakawasahan sin Allah SWT makajari niya ra isab paratungun in tatabangan daing Kaniya misan wayruun sabab amun kiyahatihan sin iypun Niya. "Iban dihilan siya sin amun wala' niya kaingati" (At-Talaq:3)

Hangkan in ummat Islam, subay tuud di' mabugtu' in paghuwat-huwat niya pa Allah SWT ha unu-unu pakaradjaan. Karna' Allah SWT ra in labi nakahati ha kalahan sin iypun Niya. Siya ra in Nagpapanjari ha katan daing ha manahut pa maaslag. Daing ha sabab yadtu Siya ra in labi nakahati sin pakaradjaan hikarayaw ha manga piyapanjari Niya.  "Iban hisiyu-siyu in naghuwat-huwat pa Allah, in Siya jukup na kanila. (ibid)

In daraugan sin Bar-iman iban manga Mu'minin yadtu ha Allah SWT. Daing ha sabab yadtu hisiyu-siyu in namandang bahawa' in kusug nakabutang ha alta', kawasa iban asu kampung niya tantu nakaguwa' na sila daing ha bitikan sin manga sila Ahli Allah.
Bangman in manga nagluluwas-lungsad ha pagmahaldika' sin Sulu Darul Islam di' malawa' daing ha paghuwat-huwat pa Allah SWT. Karna' Tuhan da in labi makaingat sin susungun iban datungan nila.

Bismillahi tawakkaltu ala Allah, walahawla wala quwwata illah billahil aliyil azeem.

0 comments: