Abunnawas Nagkissa ha Sultan III

Ha dum hambuuk, in sultan nagdaak na isab kan Abunnawas pasugpatan in kissa niya makainu-inu iban makaajaib yadtu, amun nahinang kasusuban sin Sultan. Jimawab hi Abunnawas, “Iban kagaan sin atay, wahai Sultan marayaw iban masanyang…”

Diyungug sin iypun mu, wahai Sultan masanyang, in daraakun yadtu nagsuysuy ha Sultan sina’ bahawa in bata’ ba’gu yadtu namung:

Paglabay hangka pitu in manga maguusaha dimatung kaku’, nanukut na sin siyn nila, sumagawa’ tiyangguhan kuna hadja sila pa sunuan pa hangka pitu. Pagsimana magbalik dimatung na in babai yadtu puas subuh, nangura’ ha kaldai umagak salta’ iban magjajaga kaniya duwa iypun.

Simalam siya kaku’, nakalingkud man ha kadday ku, namung siya, “way aku nakasaut ha janji’ maghatud kaymu sin bayad kakana’ yadtu. Misan bihadtu lawag nakaw madtu magsasambi’ taymaa in bayad ku ini.

Tiyawag kuna in magsasambi siyn, in siyn kiyasambian hipagbayad ha manga maguusaha kakana’. Pagubus yadtu, in siya iban aku duun na naglilingkud nagsuysuy sambil in manga kakaddayan naukab, didtu na ha masa yadtu namayad aku sin kakana’ ha manga maguusaha. Ampa na isab namung in babai yadtu, “Tuan, kawai aku ini iban yadtu.”

Nagus us na aku kimawa’ sin manga kabayaan niya daing ha kadday sin manga maguusaha, pagduhal ku hadja sin piyakawa’ niya magtuy minig, wayruun misan hangsulag bissara pasalan sin bayad niya. Ampa aku timagna’ nagsusun sin nahinang ku, sabab in halga sin kiyawa’ ku kaniya hangibu dinar, ampa aku nagbissara kalahi baran ku:

 
Mahunit tuud! Dihilan niya aku lima ngaibu dirham sagawa’ ampa siya kimawa’ halga’ hangibu dinar, adapun in manga maguusaha yadtu aku in nara nila nagjanji’ ha pagbayad hadtu. Wayruun kusug iban kawasa, mapuas daing ha Tuhan, Amun Maha makusug, iban Mahakawasa. In babai yadtu pasti’ tuud hambuuk panipu, iban mayta’ ku isab way napangayu’ in umbul bay niya.”

Nalawa’ in babai yadtu labi hangka bulan, sambil in manga maguusaha timagna’ na nanglugus magpabayad sin utang kanila iban nagsabab daing ha nakalandu’ na lugay wayruun na aku naghuwat sin pagdatung niya magbalik, piyun kuna in katan alta’ ku iban maksud hidagang. Sagawa’ hambuuk adlaw, ha sa’bu ku naglilingkud salta’ nasusa iban nahilu, dimatung in babai yadtu ampa limingkud ha kadday ku iban pagiyan, “Kawaa in timbangan iban tabuka in bayad ku ini.” Ampa niya diyuhal kakuh in siyn hangibu dinar ampa kami nagpasarap nagsuysuy sambil in aku kiyugan na isab nagbalik. Ampa niya aku iyasubu, “unu awn ka asawa mu?”  

Jimawab aku kaniya iban pagtangis, “Wayruun, Waypa aku bakas nakaasawa”

Nangasubu siya, “Mayta’ kaw nagtangis?”

Jimawab aku, “Wayruun da unu unu.” Ampa aku dima nagbissara ha magjajaga kaniya hinangun ku suluhan magpasampay sin luun atay ku. Sagawa’ in magjajaga yadtu kiyatawa ampa namung, “Sapahan ku ha ngan sin Tuhan, in siya labi in baya’ kaymu dain sin baya’ mu kaniya. Di’ niya kalagihan in manga kakana’ bini’ niya kaymu, sagawa’ hinang niya yadtu karna’ nara sin baya’ kaymu. Pamungan na kaniya unu in kabayaan mu.”

Ampa aku simuuk pa jaga sin babai yadtu sambil namung kaniya, “Tabanga na aku iban ijini aku mamung kaymu unu in nakaluun ha utuk ku ha supaya mu hikasampay ha babai yaun.” Ampa ku biyayta’ kaniya unu in kabayaan ku nakatawu’ ha laum atay.”

“Ibut ibut pasampayan tuud in bissara ku kaniya,” sambil namung pa aku, “hinanga unu unu hadja in pangayuun niya.”

In dum limabay na hadja sumagawa in mata ku masi bulat, in atay iban pikilan ku nagtatali’ hadja ha babai yadtu. Pila adlaw limabay nakaratung kaku’ in magjajaga ha babai yadtu.
Pagdatung sin magjajaga, piyalanjal ku siya ampa ku iyasubu pasal sin boss niya, in jawab niya kaku’, “in siya bihaun nahilu sin lasa kaymu”.

Ampa ku siya iyasubu, “hisiyu tuud in kasabunnalan sin babai yadtu?”

Jimawab in magjajaga, “in siya hambuuk dayang dayang amun maguupiksa kan Zubaidah, asawa sin khalifa, amun nagipat iban nagpalaggu’ kaniya. Sapahan ku ha ngan sin Tuhan, kiyabayta’ niya na kan Zubaidah in pasal mu iban piyangayu’ niya ha supaya ikaw in mabana niya. Sumagawa’ namung hi Zubaidah,” Di’ ta kamu papagtiyaunun ha sahingga kaingatan ku bang in usug yan marayaw usug atawa bukun, iban bang in usug yan matup da kaymu atawa di’.” Bihaun dahun takaw pa astana’ laung sin magjajaga, iban bang kaw magmumpaat makasud pa astana’ ha way makakita’ kaymu, in ikaw makakawin ha babai yadtu, sagawa’ bang kaw kaingatan, in ikaw kaigan u. Biyadiin?

Simambung aku, “Saddiya na aku magad kaymu.”

Ampa in magjajaga yadtu namung, “Bang dumatung na in dum, kadtu kaw pa masjid amun piyahinang hi Zubaidah ha suba’ Tigris.”

Simambung aku, “maraw na”. Ampa aku miyadtu pa masjid, simambahayang Isya ampa natug ha guwa’ sin masjid. Ha waypa in fajar gimuwa’, dimatung na in manga pila daraakun ha hambuuk bangka’ liyuluwanan baul way luun, ampa nila biyutang in manga baul yadtu ha raig masjid ubus man nagbutang minig na sila. Sumagawa’ awn nagpabin hambuuk ha ulihan, ha waktu man kila ku tiyaliti in nagpabin, kiyakilahan ku in magjajaga nagpabin yadtu amuna in dimatung nagkawa’ kaku’.

   

Bukun da malugay gimuwa’ na in babai yadtu ampa simuuk maun kaku’. Nagbangun na aku simalam kaniya, ampa siya limingkud dima nagbissara kaku’, iban sin luha’ pama ligid. Ampa niya aku diyaak pasurun pa hambuuk baul pagubus ampa niya kiyunsi’ ha guwa’. Wayra limugay in manga daraakun amun nagda sin baul kaina dimatung na isab nagdara sin indajinis panyap liyuun pa laum baul. Ubus man nagluun sin kapanyap panyapan ampa nila kiyunsian daing ha guwa’. Ampa nila biyutang in manga baul yadtu ha laum bangka’ ampa nila piyasusul ha suba’ timudju pa astana hi Zubaidah.

Ampa aku nagsusun sin hinang ku, sambil nagbissara aku isa isa, “ Sapahan ku ha ngan sin Tuhan, magkangi’ngi’ na aku ini,” Ampa aku nagtangis iban nangayu tabang pa Tuhan ha supaya aku makaguwa, hangkarai’ paman dimatung na in bangka’ pa lawang astana’ sin khalifa. Ampa iyangkat sin manga daraakun in manga baul lamud na in baul amun piyagluluunan kaku’. Diya nila in baul yadtu daing ha higad sin suba’ in kaibanan isab daraakun nagjajaga sin bangka’. Sampay in nagdara baul yadtu simampay pa nakura’ sin magjajaga. In nakura’ sin magjajaga yadtu nagbangun daing ha lingkuran niya.

Sumagawa in fajar gimuwa’ na. Hi Abunnawas wayna kayba, ampa namung in Sultan, “in suy-suy mu bunnal bunnal makainu inu iban malingkat! Laung hi Abunnawas kunsum dum in suy suy labi maglilingkat.”

In part 1 & 2 yan da ha label "tales". 

Puunan sin patta: http://stat.ks.kidsklik.com/files/2009/11/abu-nawas-gambar-wajah.jpg