Entry to TN Tarasul Contest

TAUSUG (SULU PEOPLE)

Aliazer Abdurajim

Tausug in gulal

Ha dunya landu tampal

Bangsa way nakural

Sabab sin Tuhan Tunggal

Tausug tanyag

Taga pamarinta maluag

Giyatusan tahun iyad

Sin dugu’ magjijihad

Tausug maisug

Mataud nakabantug

Karna’ sin pagbawgbug

Ha hula’ Lupa’ Sug

Tausug pulna’

Bangsa mataud sawasa’

Misan nagsusupa’ mama’

Tuhan daran miyumukalna’

Tausug bugaan

Lumanggal apu’ hinang

Hipu’ sin pamulansang

Hipagbubudjaw saytan

Tausug nakabidda’

Asal daing tagna’

Misan hula’ hiluhala’

Wayruun pa nakakawa’

Tausug masabal

Hipu’ sin pagtawakkal

Misan way bugas sukal

Di’ magpangdihil sukkal

Tausug makasi

Pa bangsa Muslim pagkahi

Bayhu’ masawmbibi

Addat in piyalalabi

Tausug matakin

Magpakusug sin Yakin

Ilmu’ in hiyahambin

Misan wayruun siyn

Tausug matilusa

Mati’but magusaha

Masuwak magsadakka

Papagkahi nasusa

Tausug pantuk

Magbunu’ di’ magirup

Bang martabbat malarut

Dugu’ nyawa hituk

Tausug mapanday

Landu’ kasi magbagay

Misan jasad masalay

Ayaw bagay mabiyal

Tausug mati’but

Ha bissara magbaggut

Misan hat bali lituk

Ha atay ra hibaggut

Tausug naghuhuna’

Kasajahitraan makawa’

Ha manga nasabbut bayta’

Jukup na anughara’

Sin Tuhan MahaKutta’

Sandakan, Sabah Malaysia

10 Muharram 1431 / December 27, 2009