Tausug para ha Katan?

"Bang lumurup pa gi'tungan laud way busu tantu di' hadja abutan in manga mahahalga' ha bulian dagat sin Sulu."

Kawni niyu kunu' manga taymanghud, bihaun ini nahilu hala' in katan pihak ha Sulu sambil pa katilingkal dunya pasalan sin identity Tausug. Awn na in nakatayma' - labi awla na in manga yaun ha Lupa' Sug amun asal matampal ha pangatud sin kaibanan sila nayaun in Tausug - damikkiyan awn da isab in wala nakatayma'.

Ha tiranan hadja sin amun giyulal Tausug bihaun mataud pa in "against" ha Tausug citizenship. Bahasa kunu' bang Tausug in usalun as Citizenship dumagbus siya isyu pagpihak da. Karna' amura kunu' in nakatayimbabaw in Tausug. Labi na bang ha dugaing pihak biya' na sin Yakan, Kalibugan, Jama mapun iban sin kaibanan pa.

Sin pila adlaw nakalabay awn daing ha manga professionals sin taymanghud Yakan nagoppose ha idea Tausug Citizenship. Karna' bang para kanila bang sambil Yakan tawagun da Tausug in sakaula-ula kalungkupan sila atawa malawa' in kaprulpulna' nila. Bang laung ta isab kunu' hapagkawasa bang Tausug in maguhan in sila wayruun da "chance" dihilan kawasa mataas ha parhimpunan. Baha' hangkan nila nasabbut in hikaruwa ini pasalan sin manga hal jimatu ha masa sin pagMNLF.

Amuyadtu in manga maniyu' tiyu' kahiluhan pasalan sin pagTausug Citizenship.

Bang ha pangatud sin United Tausug People/Citizens, in TAU-SUG bukun siya manunjuki hambuuk pihak adapun bangsa. Adapun in TAU-SUG bang ha Anggalis SULU PEOPLE. In pangasubu unu in tau ha Sulu, Tausug hadja, bang sawpama in Tausug natarbilang hambuuk pihak hadja? Bukun ka in hambuuk hula' amun taga ukumsakup (sovereignty) awn tuud ngan piyagtibuukan nila? Bukunka in SULU bakas namarinta malugay pa daing sin pamarinta sin Pilipinas? Bukunka in ngan piyagtag kanila sin tau daing ha guwa' duun naka in sila tau daing ha Zamboanga, Basilan, Jolo, Siasi, Bongao in pagtag kanila SULU PEOPLE? Bukun paka mamarahi in manga katanda' tandaan ha nakalabay sin in TAU-SUG bukun hambuuk pihak?

Bukunka in ngan sin kahula' hulaan ha Sug nakauna siyusugpatan ha ulihan sin ngan SULU? Biya' na sin Basilan, Sulu, Jolo Sulu, Bongao Sulu iban sin kaibanan pa.

Daing ha sabab in papanaw sin UTP/C magpalimaya sin hula' ha tiranan sin Sulu Archipelago, wayruun buli rapat in subay ra hipahati in manga pikilan pasal Tausug ini. Unu unu na in pangatud niyu ha hal sin TAUSUG, asal piyatatampal sin kami in TAUSUG bukun hambuuk pihak adapun Bangsa sin katan pihak naghuhula' ha tiranan sin Sulu Archipelago.

Mapuas daing hayan bang awn pikilan niyu ha tungud sin topic ini amun kalagihan natu' pagbissarahan marayaw yan awn "FORUM Button" ha taas klika niyu hadja ampa kamu butang sambag didtu.

Picture source:  www.nctc.gov/site/groups/asg.htm