Hawnu na in manga kaguruhan?

Hula' Sabah, amuna in hula' pagtutulakan sin Bangsa Tausug ha jaman nakauna pagpanglagan ilmu. Pasal sin mataud kaguruhan daindi magdatung daing ha hula Arab magpasaplag ilmu' sin Allah SWT. Hambuuk na daing kanila biya' na ha mawmaas hi Syeikh Hasabollah Atthohiri. Mataud pa daing ha manga kaulamaan Ahlul Bait nakauna nagpakaubug ha Lupa' Sulu amuhadja way tana naurul in manga kalimpaan nila.

Ulama' Ahlul Bait ha Jaman ini

Bihaun ini in makasusa wayruun na kaguruhan daing ha manga Ahlul Bait magtibaw katu' magpasampay sin Ilmu'.   Magam gam ha Sug misan wayruun Ahlul Bait magdatung, masi mataud kaguruhan daing ha Bangsa Tausug in nagpakapusu' na sin ilmu' sin Allah ha guwa' hula' iban ha laum Sulu. In makasusa amun manga Bangsa Tausug nagtulak pa Sabah (timulak bukun manuntut ilmu', sa' maguy daing haka hiluhalaan).

In kaanakan sin bangsa kaibanan nanuntut ilmu' in kaanakan sin bangsa Tausug nanglulunsulan

Hapagpaguy nila ini sambil ilmu' agad nalapay na piyaguyan. Hangkan ta maiyan lamud na ilmu', pasalan sin mahang daing kanila in magtuyu'-tuyu' ha    kaanakan nila magpaiskul iban magpapangadji agama. In sabab niya; hikaisa, in sila di' na makaluhaya magpaiskul atawa magpapangadji ha kaanakan pasalan sin way katarrangan marayaw amun jarihun sin pamarinta Malaysia. Hikaruwa, hinangun nila na in kasigpitan sabab dakula' sin di' hikapagtuntut ilmu' sin kaanakan. Hikatu,mahang in kaguruhan sin bangsa Tausug magdatung pa lungan diyuruunan nila magpatubu' sin ilmu'. Hikaupat, kulang in pagmasusa iban paglawag dan sin manga kanakuraan bangsa Tausug ha tungud pagpatuntut ilmu' ha kaanakan sin bangsa nila. Hikalima, wayruun nabaktul marayaw sin bangsa Tausug bang biyariin hikaratung sin Ilmu pa lungan sin Bangsa nila hawnu hawnu na binaybayan. 

Misan bihadtu awn da isab hambuuk pa ruwa guru bangsa Tausug yan nagmamatuyu' magpaingat ha bangsa nila di ha Sabah. Ha kiyasakupan sin nagsulat hambuuk daing kanila biya' na kan tuan Mahmud iban hi Ustadz Hanzala. Alhamdulillah in sila ini nagparagan sin pagpangadji ha lungan diyuruunan nila, misan in kaawnan inut inut. 

In hal pagpangadji ini subay tuud pagpikilan sama-sama bukun hadja subay naghuhula' di ha Sabah, adapun sambil manga katawtaymanghuran amun yan hakaguwa' guwaan yan nangangadji labi awla na ha manga sila yan nangadji ha Al-Azhar, Indonesia, Yemen iban sin kaibanan pa lamud na in kaguruhan daing ha Lupa' Sug.    Pagpikilan tuud subay, sabab in huwat huwat sin bangsa natu' wayra rugaing daing sin bangsa nila kandi (daing ha ijin sin Allah) in makapaintul kanila. 

Unu unu pikilan manunjuki pa hal ini, saddiya kami dumungug sin pikilan daing kaniyu manunjuki pa pagtuntut ilmu sin bangsa natu' di ha hula Sabah. Parahan hadja pa email ini unu unu in kabayaan niyu hi agsu' kamu' - aabdurajim@gmail.com .