Tagama Kaw!

Laung sin hambuuk ilmawan

Kabuhi' ini samantara' 

Upamakun nagtulak-tulak

Ha dunya hipu' sin panulaysulay

Hapaglayag-layag ini 

Bukun kita piyasasaran

Magtubba' sasab madtu mari

Bang way ilaw nabaktul

Sarta' dan piyabuntul

Dundungi in kabtangan hi Luqman

In dunya ini ibarat laud malaum

Mataud manusiya' in magkahulug pa laum niya

Bang kaw mabaya' masalamat 

Untasa in laud yan sin bangka' amun ngan niya Taqwa

In luun niya amuna in Iman

In layag niya amuna in tawakkal pa Allah

Ya sabarang hamba Allah

Katan kitaniyu ha dunya

Wayruun dugaing tiyatagaran 

Amura in magbalik Kaniya

In pagbalik ini tiyawag nila kamatay

Amun magpabutas sin naglalasa

Karna' awn labi apdal sungun niya

Puunan sin kasilasa

In manga sila sawasa'

Asal sila tagama

Magbalik pa kabuhi sampurna'

Hula' wayna tubtuban

Ayaw kitaniyu makawa' sasat

Sin manga sila miyamagad ha huna' huna' sin hannas

In pangarati dunya ini kakkal

Wayruun sara' agarun, wayruun da paghukum

In katan bayta' nila yan 

Bangman kitaniyu malusut

Bangman kitaniyu mahulug

Bangman kitaniyu makasumba 

Pa saytan La'natullah

Magbalik kitaniyu pa Tagmilik

Ha di' pa magtupad in duwa siki

Awal daan kitaniyu daing Kaniya

Hangkan subay di hikasusa

In kamatay yan nahinang hadja sasakatan

Muwi' magbalik pa Allah SWT.

KAMATAY nagtatagad paghuwas ini nagsulat

Paghuwas niyu nagbassa..

Tagama kaw!