Magsugpat sin Lubid Pagtaymanghud

Assalamu alaikum warahmatullahi Wabarakatuhu.

ALHAMDULILLAHIL LAJI ANJALA ‘ALA ‘ABDIHIL KITABA WALAM YAJ’AL LAHU IWAJA’. ASHADU AN LA ILAHA ILLA ALLAH WAHDAHU LA SHARIKALA, WA ASHADU ANNA SAYYIDANA MUHAMMADAN ABDUHU WA RASULUHU, ALLAHUMMA SALLA WASALLAM WA BARIK ALA MUHAMMADIN WA ‘ALA A-LIHI WA ASHABI WAMAN TABI ‘AHUM BI IHSANIN ILA YAWMIDDIN (AMMA BA’AD) FAYA- AYYUHAL MUSLIMUN ITTAQULLAHA HAQQATU QATIHI WALA TAMUTUNNA ILLA WA ANTUM MUSLIMUN.

Maasyirul Muslimin, adlaw jumaat amun miyuliyya sin Allah SWT..

Subay daranun natu’ in pagpasung sin pagmabuga’ pa Allah SWT. Amun pagpasung ha laum sin himihinang sin manga daakan Niya iban tulus ihlas amun tuput da rida’ sin Allah SWT in hiyuhuwat huwat samata mata ha wayruun riya’, atawakan pakita-kita’.

Salta’ pakusugun in pama’gangi ha katan piyanglangan Niya damikkiyan amura in huwat huwat in rida’ iban pahala’ daing ha mahasutci Allah.

Manga jamaa kiyaridaan sin Allah SWT…

Ha antara parinta iban piyanglangan sin Allah SWT amun harus natu’ hinangun iban amun subay natu’ tinggalan amuna in magsugpat sin Silaturrahim iban amun mamugtu-e kaniya.

In Rasul SAW bakas nagsabda ha hambuuk hadis amun kiyariwayat hi Imam Ibnu Majjah, ha maksud niya:

                “In hambuuk parakala’ amun masapat makaparatung karayawan amuna in pahala sin tau naghihinang marayaw iban magsugpat sin pagtaymanghud, atawa silaturrahim. Iban in amun masapat isab makaparatung kangian amuna in manga tau naghihinang mangi’ iban amun mamugtu-e sin parsugpatan pagtaymanghud.

Manga jamaa kiyaridaan sin Allah SWT…

Damikkiyan in sabda sin Rasul SAW amun nagpatarrang katu’ bang biyadiin in kangian sin tau mamugtu-e sin parsugpatan silaturrahim atawa pagtaymanghud, sabab in silatturahim atawa pagtaymanghud makaparatung karayawan pa manusiya. Karna ha laum niya maawn in parsugpatan ulung iban kasih, pakaniya pakaniya maghipu’ sin kalalagihan, awn pagpangaruhan, iban pagpangayuan nasihat hipagsalassay unu unu kasusahan in dumatung, sahingga lumuhay kanila in kasigpitan unu unu ha dunya.

Damikkiyan da isab in ngi’ dagbus sin tau amun namugtu-e sin parsugpatan amun diyaakan sin Allah SWT hipapasugpat. Karna’ in tau mamugtu-e sin parsugpatan pagtaymanghud maawn daing kanila in pananaman bunsi, magtawu’ sakit atay amun piyaawn sin syaitan. Iban ingatun ta niyu in katan unu unu piyaawn sin syaitan in baynat niya bukun hadja marayaw, iban tantu tuud in hinapusan niya mangdahi katu’ taniyu pa laum api narka’ jahannam amun kiyajanji’ sin mahasutci Allah.

Daing ha sabab yadtu, magsama sama kitaniyu magtali’ iban magayad ayad ayaw sampay bugtuun natu’ in parsugpatan pagtaymanghud, sabab in akibat niya yadtu tantu magbalik da pa ginhawa baran natu’ amun in dagbus niya kabinsanaan daing ha dunya sampay pa adlaw ahirat.

Parman sin Allah SWT ha Sura Shad ayat 26:

“Iban ayaw kamu magad ha hawa napsu, karna’ in yadtu manglawungi kaniyu daing ha dan sin Allah, para kanila tiyatagama in ajab sabu’gat bu’gat, karna’ kiyalupahan nila in adlaw pagbista”.

Manga jamaa miyulliya sin Allah…

In pamugtu-e sin parsugpatan pagtaymanghud amuna in dagbus kabayaan sin hawa napsu amun yari ha laum ginhawa natu’, bang natu’ agarun in hawa napsu yadtu, tantu malawung hadja kitaniyu iban makasiha’ kitaniyu daing ha dan sin Allah SWT. Salta’ in Allah SWT nagtatagama siksa’ sabu’gat-bu’gat katu’ taniyu ha adlaw ahirat, sabab bang kita mamugtu-e sin parsugpatan pagtaymanghud, bima’na kiyalupahan natu’ in adlaw paghisab sin ammal.

In tau amun mamugtu-e sin pagtaymanghud, biyayta’ sin Allah SWT bilang tau amun nalupa ha adlaw paghisab sin ammal. Ini nagdara maksud kiyalupahan natu’ sin awn pagsiksa hi paratung sin Allah pa manga sila amun mamugtu-e sin parsugpatan pagtaymanghud amun bilang daakan sin mahasutci Allah. Bang natu’ kiyaingatan in bu’gat sin Ajab amun hiparatung katu’, tantu di’ kita makaisug mamugtu-e sin parsugpatan daing ha hangkatau pa hangkatau.

Manga jamaa kiyakasihan sin Mahasutci Allah…

Ha supaya mapalihala’ daran in parsugpatan pagtaymanghud, subay daran paawnun in pagtibaw tibawi pahambuuk pahambuuk, ha supaya in parsugpatan humugut, dih magbugtu’ in kasilasa, sampay dumagbus in sabda sin Rasul SAW, laung niya;

“Di’ masampurna in iman sin hambuuk manusiya’ sahingga in lasa niya ha taymanghud niya, biya’ sin lasa niya ha ginhawa baran niya.”

Bang in kaawnan natu’ daran magtibaw tibawi, tantu in pagkasilasa dumagbus, sampay lumasa na kita ha taymanghud ta biya’ sin paglasa ta ha ginhawa baran ta kandi. Daing ha sabab yadtu in rahmat sin Allah SWT simasarta’ na katu taniyu, Insya’Allah. Sabab sin naparagbus natu’ in pagtaat ha Allah SWT iban Rasul niya.

In Allah SWT nagparman ha Sura Annur ayat 52, maphum niya:

Iban hisiyu siyu in nagtaat ha Allah SWT iban Rasul Niya, salta’ nagmamabuga’ pa Allah SWT  iban nagTaqwa Kaniya, tantu sila na yadtu in manga tau nagkasanyangan.”

Daing ha sabab yadtu, mangayu’ kitaniyu Kaniya bangman kitaniyu dihilan kusug umatubang ha saytan iban ha hawa napsu amin simisilawak mangdahi katu’ taniyu mamugtu-e sin pagkasilasa daing ha hangktau pa hangkatau. Ameen ya Rabbal Alameen

A’JUBILLAHIMINAS SYAITAN NIR RAJEEM, FAMAN KANA YARJUW LIQA-A RABBIHI FALYA’MAL ‘AMALAN SYALIHAN WALA YUSRIK BI’IBADATI RABBIHI AHADA’, BARAKALLAHU LI WALAKUM FIL QUR’ANIL AZEEM, WANAFA’NI WAIYYAKUM BIMA FIHI MINAL AYATI WA ZIKRIL HAKEEM. WA TAKABBAL MINNA WA MINKUM TILAWATAHU INNAHU HUWAS SAMIUL ALEEM. WA QUL RABBAG FIR WARHAM WA ANTA ARHAMUR RAHIMIN.

(In Sulat bakas piyanghutba' ha Masjid sin Tau Sug di ha Sabah. Nakawa in luun ini daing ha kitab Malayu siyalin bahasa pa Sinug)