Tubig Laya nakabidda' ha Dunya

Ubus nagminnu-minnu ha Billukan, Buansa siyagina aku hi tuan Sharif Murakib bang aku saddiya na magad kaniya pa Patikul. Wala ku siya iyan bukun pa, magtuy aku timulahad tanda' sin baya' ku kimita' sin pagtagun nila Tubig Laya.

Pagdatung namu pa laum Tiyanggi himapit pa in tuan Sharif ha tabu' nami ista'. Sambil in aku namatta'-matta' pa sin laum tabu' ganta' hinangun panumtuman. Nanusul-nusul kami sin Serantes sambil nangatud ngatud na in tuan Sharif sin mutul kasakatan namu'. Pasal bang kunu' mutul masapat kami dumatung lagi' hikahatud pa kami pa Tubig Laya. In ngi' sin sukud  sa'bu wala duun in mutul, sa' kami simakat jeep iban tuan Sharif. Hangkaraih da kami nagtagad nahipu' na in jeep. 

Nakadagan manga 10 minit dimatung na kami pa nanaugan tudju madtu pa Tubig Laya. Siyukayan na sin tuan Sharif 40 pisos, in jeep timuy na madtu pa unahan, in kami timuy ra isab sin panaw namu' madtu pa Tubig Laya. Ha pagpanaw pa laum wala' nabugtu' in pagsuy-suy namu' iban tuan Sharif sin manga kakahinang amun kiyapagtaayunan sin bangsa Sug daing ha angay ini. Miyabut man kami pa bayingtungaan, awn nakalabay nagmumutul, pagkita' ku bakas tau Sambuwangan, sintak namu' hadja in lima pakaniya-pakaniya tanda' sin dih na kasautan magdagpak in lima magsalam. Kiyugan isab in atay ku karna' sin duwa na in kakilahan ku duun.

Hangkaraih paman bay na sin tuan Sharif in ha unahan namu'. Himapit in tuan Sharif hangkaraih kimawa' tadjung sambil naghapit sin ista' diyara namu' daing ha tiyanggi. Nakapanaw kami manga 3 minit daing ha bay niya dimatung na kami pa Tubig Laya. Magtuy aku piyakita sin tuan Sharif sin batu taga sulat Lannang. In batu yadtu bang way kimita' piyararaub sin tau, subay hadja awn kimita' ampa nila baliskatun. Agun agun na aku lumaksu pa laum sin Tubig Laya, sagawa way marapat pasal sin way nakara pagsalinan. 
 Nag-ail na kami ha higad sin Tubig Laya sambil kiminam sin tubig bang maunu in nanam. Ubus nag-ail simaut na kami iban tuan Sharif simambahayang luhul, in waktu lisag duwa na. Pagsud ku pa laum masjid nakahuna' huna' aku bang mayta' in lantay sin laum masjid bukun simintu. Wala' naa aku imasubu ha tuan Sharif, subay na ubus sumambahayang. Pagubus simambahayang, wala na kami nakaig ha lingkuran nangasubu na aku ha tuan Sharif pasal sin masjid iban Tubig Laya.

In ngan Tubig Laya nakawa' daing ha kajadian jimatu ha masa sin apu' tuan Mahadum Aminullah pagtagun da isab apu' tuan mahadum Alimullah sin tau naghuhula' duun. Laung sin tuan Sharif hambuuk waktu kunu' bilang panungbasi sin apu' Mahadum kan apu' Pikit (sabab sin dihilan niya butung in apu' mahadum) kimuut siya pa bulsa sin juba niya, pagutung kunu' laya in gimuwa'. Ha bugsak panagnaan nara in katan kasagbut-sagbutan, paghikaruwa awn na tubig gimuwa' daing ha bulian lupa', paghikatu bugsak didtu na kunu' gimuwa' in manga kaista'-istaan. Nagsabab daing ha pakaradjaan yadtu in apu' Pikit naig na in pikit sin siki niya, daing ha ijin sin Allah, sambil namut na siya sin ista' dahun niya pa bay. In tubig miyustak daing ha bulian amunadtu in puunan sin Tubig Laya.
Hangkan sambil pa bihaun in Tubig yaun masi pa awn kapin karamat niya. Laung hi tuan Sharif in lantay sin masjid kunu' yaun di' ma us-us simintuhun. Bang kunu' masimintu in Tubig laya malubug sambil didtu in sabab hikamatay sin tuburan.  Bakas nila siyulayan diyusta', hat hadja nagsimintu sin hagdan subay liyabay baid iban nagsumbayi' manga manuk bilang pagduwaahan ampa sila diyulan. In Tubig Laya kunu' awn tunggu' niya babai, di' tana hikatugila' bang jinn ka in tunggu' yaun atawa amun manga nyawalihan sin manga nagkamaruhum duun. In mahalga' didtu in Tubig yaun di' maus-us lummuun sin tau daing ha guwa'. Gamman bang awn tau maun, imibug hadja sin lingkat iban lanu' sin tubig. Hambuuk adlaw bang in hula Sultaniyya gumuwa' magbalik, in manga bihaun subay ma upiksa' marayaw sin tau lahil ha supaya in manga huling bata' makahampit sin bakkas piyaglugtuan sin nagpangIslam pa Lupa' Sug.

Ubus simambahayang asar, gimuwa' na kami sin masjid, timudju harap pa tampat sin apu' tuan Mahadum Alimullah. Daing pa hakalayuan kakitaan tana in tampat yadtu iban sin lika iban manga kakubulan haraig niya. Hambuuk daing ha manga lika yadtu haraig amuna in namaruhum Sultan Alimuddin kaapuan sin liyuuran Shakirullah. Miyuna in tuan Sharif pa laum ad sin tampat, ampa aku simunud. In tanda' sin paghulmat in tawmpa namu' binin ha lawang sin ad ha supaya di' karahan kanajis najisan daing ha guwa'.  Simalam man in tuan Sharif sambil nagduwaa pa Allah SWT, bigla' in atay ku najugjug, sambil in luha' ku wala' kiyasaggaan gimuwa'. Adlaw yadtu way sumarap sin parasahan kiyananaman ku. Baha' daing ha karamat biyus sin Allah SWT ha manga kakasi niya yadtu sambil hat dumuwaa ha taas kubul nila mabiya' kita sin ha laum ais misan biyadiin pasu' sin suga. Sambil hadja kami timaykud daing ha tampat yadtu in pananaman malugay naig daing kaku'. 
Ha bayta' sin tuan Sharif pagpatay kunuh kan apu' mahadum yadtu awn murid niya imunung kaniya pa laum kubul. Naglilla' nagpakubul misan buhi' ha karna' sin lasa ha guru niya. In ngan sin murid yadtu hi Ali. Yadtu ra hangka ad iban tampat in sunduk sin murid yadtu. Ha hansipak isab, yadtu kunu' in tampat sin Lannang Huy-Huy, amura kuman piyanglupahan kami wala' nakatuy madtu baha' waypa sukud makatibaw kaniya.

Sin mahapun yadtu minuwi da aku pa Billukan, sambil in tuan Sharif miyagad da kaku' iban sin ahli nila pasal sin pagdum yadtu miyagad sila ha lansa harap pa Sambuwangan. In pagtibaw pa Tubig Laya amunadtu in hinapusan sin paglunsul ku haka gimbahan sin Lupa' Sug. 

Hambuuk waktu in manga tampat malilingkat bihaini subay halgaan sin manga kanakuraan iban anak apu', karna' bang bukun nagsabab daing kanila yadtu hisiyu baha' kitaniyu bihaun? Di' da hikakangi' in pagtibaw pa tampat bang in aqeeda ta haka Islam matampal, bukun paningud singud. Hambuuk adlaw, bukun isab tungga', insya'Allah kalu kami makabalik da lumatag sin Patikul. Mataud pa in kalagihan ubugun ha Lupa' Sug bang kita mabaya' humati sin manga liyabayan sin nangIslam ha kaapuan taniyu.

0 comments: