Adlaw haylaya, nakatumtum aku sin hal magjatu ha Sandakan amun wayruun dugaing hinangun daing sin manibaw pa kalawlahasiyaan pagubus hadja magsambahayang eidil fitri ha masjid. Misan in kaawnan wala' aku nakasambahayang nagbunyug iban kalawlahasiyaan ha masa yadtu, in niyat ku ha manga UTC ha Buansa biya' da sila ganti sin manga lawlahasiya ku. Paguwi daing ha masjid, namaid aku hakatawtaymanghuran mangjiyara pa Tulay. In ganta' pagabut madtu magpaiban aku ha hambuuk pangtungud harap pa gimba Lagasan manibaw kubul hi amah. Alhamdulillah, ubus namu' man nagjiyara simakat kami pa taas mutul ampa nagpalaruy harap pa gimba.
 |
| Kabataan imaalup Pagligut ha Tulay |
In kiyagastu namu' gasulin harap pa gimba hangka liter da in satiyap mutul. Mataud pa in mausiba siyn sin manga magliligut kabataan iban magpapanayam hapus kiyalabayan namu' ha higad dan daing sin hipami gasulin. Timagna' daing ha laum daira sampay pa kagimbahan mainu-inu kaw sin nagtitipun sakali pagpanayam hapus in iyaalup sin manga bata' maas. Makasusa magkita sin pagpanayam, sagawa' makakuyag da isab magpatta' sin katilibut.
 |
| Dan tudju pa Maimbung |
In dan tudju pa Maimbung mayu' in diyayawan daing sin tagna' kalabay dunhan. Misan bukun aspal (dan biyubutangan kitlan) in dan maglaruy hadja in mutul wayruun agad lubbak kagiikan. Amura nakakinam binsana in mutul iyaagaran namu' ha paglipuwas sin Maimbung tudju pa Kulasi. In dan bang sa'bu ulan di agad kalabayan pasalan sin wayruun nasimintu. Magduruhun in ngi' sin labayan ha waktu kami timudju na pa Lagasan. Bang makaabut na pa mangi' dan sa' kami numaug, in pisak yan madtu mari in pigsik bang matasak na sin silikan mutul. Bihadtu ra in palantara' sin dan ha panagnaan katibaw ku pa Lagasan ha tahun 1996, sagawa' miyabut hadja in 2010 wayruun da pindahan.
 |
| Masjid Li'dung |
 |
| Jambatan ha Maimbung |
Ubus namu' nanibaw kubul, nagparagan kami nagbalik harap pa Maimbung, sambil limaus namatta' madtu pa Jambatan. In Maimbung bakas hambuuk tanug durungguan ha jaman sin Kasultanan Sulu namarinta. Bihaun, in jambatan sin Maimbung yaun pa masi, tumagad dakuman ha manga tau guwa' dumunggu' maun magha'was sin luluwanan nila. Di' na aku mainu-inu, "laung ku ha ungud ku bang mayta' in Maimbung hinang pagdaratungan sin kappal daing ha dugaing hula' nakauna". Daing ha jambatan Maimbung kakitaan in Bud Tapul, Kabingaan, Patian, Bud Pata, iban sin kaibanan pa. Di' makasumu umatud sin katilibut, awla labi bang sa'bu malinaw in dagat.
Paghikaruwa sin adlaw, sa'bu daut ulan timudju na kami isab pa Parang. Simintu ra isab in dan madtu sagawa' di mabiya' sin dan pa Maimbung in dayaw. In tamungun namu' way sab agad nabasa' katan sa' bang dumagan na in mutul di' hikasipat in haggut bang dumagpak in hangin pa baran. Pagdatung namu' pa Parang, simud kami pa kahawahan basahun magpaig haggut. Duun na kami pama supa' sin bangbang Parang, daing ha wadjit pa apam agad nasapsay, nagtup na iban sin kahawa mapait-pait. Kimu' man in ulan himarap kami pa sadlupan sin Parang ganta' kimita' sin pagpapayguan dagat. In muna muna mikit ha pangatud amuna in "MNLF SHIP" piyarurung harap pa Tapul. Daypara in MNLF Ship yaun simintu ra bang bunnal "Ship" marai' nakalibut na sin dunya lugay ha pagtagaran sin daraugan sin hula' iban bangsa.
 |
| Way naman simasampay in dung kappal ini |
In lingkat sin dagat agun-agun kami makalaksu sin baya' maygu. Daing ha sabab sin wala namu' na niyat in mamaygu' dagat in hinang namu sa' dakuman nagpawpattaan. In lingkat isab sin Bud Tapul sa'bu piyapayungan sin gabun in puntuk niya. Sa agun agun bang awn pikpik namu' misan dakuman hangkarai' lumupad madtu pa puntuk bat namu' kakitaan isab in lingkat sin kapuan Sug.
Masi pa bunuk-bunuk nagparagan na kami sin mutul harap tiyanggi. In maksud namu' harap pa Parang dimagbus na. Mura-murahan hapagbalik namu' kalu in kasaksian namu' dugaing na isab - hi duwaa pa Allah SWT bangman pindahun pa karayawan daing sin pa kangian.
0 comments: