Imubug ha Hula' Kalasahan

Malugay-lugay kami way nakablog, sabab mataud makaibug ha katilingkal Sulu, labi awla ha hula' Sabah amun nahinang sabab kiyakawa' sin lipaga namu'. Muna-muna na in kahalan sin Tau ha laum niya amun daing tagna' tanug ha mata sin dunya, amura kuman ha bihaun in kabansagan yadtu nahinang dakuman hambuuk tagainup. Adapun in hal nila bihaun biya' sin sapantun anak ilu piyaminmin ha hambuuk bay hipu' sin tau maiku jangki.

Ha laum sin bay ini nakalamud kami nahinang saksi' ha kahalan sin bangsa daing pa ha masa kabulat sin mata namu' sampay pa masa ini. Daing ha sabab yadtu wala' namu' pikil in sarap sin magpakatabuk pilak bulan-bulan iban magtug ha taas kulangan mahagnul; karna' bang namu' di' anggawtaan in kikita' namu' karayawan para ha bangsa, biya' da kami sapantun makita' sa' na "paralyze" in duwa siki namu'. Mabuga' kami mahinang daing ha manga tau masuwak magbissara sa' di' maganggawta; mabuga' kami in kaanakan ha susungun luwal dakuman bakkas sin kaIslam in kakitaan nila; mabuga' kami in kaanakan di' na makaingat sin bangsa nila biya' sin bakas kiyalabayan namu'; mabuga' da isab kami in hula' namu' kalasahan di' makabalik pa laum ukum milik sin bangsa biya' sin nakalabay giyatusan tahun. Daing ha sabab sin kabuga' namu', nangayu' kami suhud pa Tuhan in mikirihil isug iban pamikil, katutug ha laum karayawan, iban pahugutun in pangatayan ha pagpalindug sin bangsa amun sung na kalupahan sin katan ha muka gumi.

Iyubug sin duwa siki namu' iban tawakkal in ginlupaan diyuruunan sin bangsa Tausug ha hula giyulal "Sabah". Karna' mataud didtu malanu' pangatayan; masandal ha kasigpitan; mabaugbug ha agama; iban pati tabangun ha bangsa. Huwat huwat kami pa Allah in hinang marayaw lumantup da damikkiyan in hinang mangi hi lu'dang da.

Magpahugut na hadja sin panindug sama-sama, asal in laud bukun hadja daran malinaw. In Allah SWT di' maglipay ha pagjaga ha manga sila tau masandal iban masabar ha panandas niya.