Pagsilak Magbalik

Tumaka limigut in dunya

Pag tu’gum sin adlaw in dum tumagna na

Ha katihabaan sin waktu magduwaa sadja

Adlaw-adlaw, dum-dum panun na sin pikilan

Kahalan sin hula’ sumandung daran

Ampa na hisulak humugut gam man

Ha tungaan sin dum hipus in hula’

Ha pag lindu-randam di makatug sampurna

Kabinsanaan sin bangsa in huna-huna

Pasandungun in sahaya bat gumuwa

Bang man kunsum pagsawa sin sātan

Amuna in ba’gu kabuhi ha gikapan

Si‘nag timalik gimapi’ sambil langit

Sumaksi’ bulan bituun ha pagsilak magbalik

Nelson Singson Dino

Zamboanga City 2007

Source:http://indaginislangan.yolasite.com

-------------------------------------------

Adlaw adlaw in Bangsa Sug ha likupan sin dunya naligap pakaniya-pakaniya hapaglagan kabuhianan, sagawa' mahunit malawa' ha pangatayan nila in tanhud sin pamarinta liyabayan ha laum sin bigi jantung. In baya' nila numanam sin hula iban bangsa taga pamarinta sa' na hadja hi agad ha duwaa. 

Awn daing kanila, nahinang na panun ha kabuhi' in pagpikil sin bangsa iban kahalan sin hula'. Daing ha sabab yan awn daing kanila wayna miyut sin kaput dunya karna' napikil nila in kalimayahan sin hula' di' maparagbus sahingga di' siya dihilan lipaga. Di' makainu inu mayta' in manga magjijihad nakauna atas magpagirit sin pais bangman in anak apu' nila di' na mabiya' sin niyananam nila in kasigpitan, atas nila hibin in anak asawa iban asu kampung ha supaya in kaadilan mapatindug iban kagantian in manga nakura' amun luwal da in kaingatan magkura' hadja sa' di' maghaatay sin hikarayaw ha kiyuraan niya. Ampa in parakala' ini hambuuk hinang, bang kiyatakdil na misan pa hisulak gamman na di' mabu'lak.

Ha waktu mahanung in katilibut, in kaagi nila magpikil sin susungun sambil dahun matug. Haggut sin alu' kumugdan, pais manginug kinug, masi masi hi sujud pa Tagdapu sin katan alam bangman in kalimayahan sin hula Sug dumagbus.

Insya'Allah, kalu ha panaw ini in bangsa Sug makasaksi' na sin susungun, karna' in kahalan nila lamud na natarbilang ha pagbaya' sin AR-RAHMAN. Marai' na tuud mabungkal in kiyatatabunan pamarinta, mabulakay ha mata sin dunya...Ya Allah yan da kaymu in daraugan sin Sulu Sultaniyyah Darul Islam..Allahu Akbar!!!